دہلی فسادات معاملہ: پولیس کو ہائی کورٹ کا نوٹس، یو اے پی اے کے ملزمین کی ضمانت عرضی پر جواب طلب

ماعت کے دوران سلیم ملک کے وکیل نے عدالت کو بتایا کہ ان کے مؤکل کے خلاف عائد الزامات وہی ہیں جو دیگر شریک ملزمین، جیسے سلیم خان اور شاداب احمد، پر لگائے گئے تھے، جنہیں حال ہی میں سپریم کورٹ سے ضمانت مل چکی ہے۔ وکیل نے دلیل دی کہ مساوی حالات میں سلیم ملک کو بھی ضمانت دی جانی چاہیے۔ وہیں اطہر خان کے وکیل نے بھی عدالت کے سامنے یہی مؤقف رکھا کہ ان کے مؤکل کا کردار دیگر ضمانت یافتہ ملزمین سے مختلف نہیں ہے۔ وکیل نے کہا کہ ٹرائل کورٹ کی جانب سے ضمانت مسترد کیے جانے کا فیصلہ درست نہیں تھا اور ہائی کورٹ کو اس میں مداخلت کرنی چاہیے۔

دہلی پولیس کی جانب سے پیش ہوئے وکیل دھرو پانڈے نے ان دلائل کی مخالفت کی۔ انہوں نے کہا کہ یہ کہنا کہ تمام ملزمین کے کردار یکساں ہیں، مکمل طور پر درست نہیں ہے۔ پولیس کے مطابق ہر ملزم کے خلاف شواہد کی نوعیت مختلف ہے اور اسی بنیاد پر ٹرائل کورٹ نے ضمانت سے انکار کیا تھا۔ عدالت نے معاملے کی سنجیدگی کو دیکھتے ہوئے ٹرائل کورٹ کا مکمل ریکارڈ طلب کر لیا ہے۔ ساتھ ہی یہ بھی واضح کیا کہ نوٹس جاری ہونے کا مطلب یہ نہیں ہے کہ ملزمین کو فوری طور پر کوئی راحت دی جا رہی ہے۔ عدالت نے پولیس کو ہدایت دی کہ وہ مقررہ مدت کے اندر اپنی اسٹیٹس رپورٹ داخل کرے۔

یہ پورا معاملہ فروری 2020 میں دہلی کے شمال مشرقی علاقوں میں ہوئے فرقہ وارانہ فسادات سے جڑا ہے۔ الزام ہے کہ شہریت ترمیمی قانون کے خلاف ہونے والے مظاہروں کی آڑ میں ایک بڑی سازش کے تحت تشدد کو منظم کیا گیا۔ اس کیس میں یو اے پی اے اور بھارتی تعزیرات ہند کی مختلف دفعات کے تحت کئی افراد کو ملزم بنایا گیا ہے۔ اس معاملے میں طاہر حسین، عمر خالد، خالد سیفی، گلفشاں فاطمہ، شاداب احمد، سلیم ملک، محمد سلیم خان، اطہر خان، شرجیل امام اور دیگر افراد شامل ہیں۔ بعض ملزمین کو پہلے ہی مختلف بنیادوں پر ضمانت مل چکی ہے، جبکہ کئی اب بھی عدالتی تحویل میں ہیں۔