پاکستان کی ناپاک حرکتوں کو ہندوستانی فوج نے ’آپریشن سندور‘ کے ذریعہ ناکام بنا دیا ہے۔ پاکستانی فوج کے حملوں کا ہندوستان لگاتار منھ توڑ جواب دے رہا ہے۔ نتیجہ کار پاکستان میں افرا تفری کا ماحول ہے۔ اس درمیان ہندوستان کا بچہ بچہ ہندوستانی فوج کی حمایت میں کھڑا دکھائی دے رہا ہے۔ ہندوستان کے مایہ ناز کرکٹرس روہت شرما، وراٹ کوہلی اور جسپریت بمراہ نے بھی ہندوستانی فوج کی حمایت میں سوشل میڈیا پر حوصلہ افزا پیغام جاری کرتے ہوئے انھیں سلام پیش کیا ہے۔
حال ہی میں ٹیسٹ کرکٹ سے ریٹائرمنٹ کا اعلان کرنے والے طوفانی بلے باز روہت شرما نے ہندوستانی فوج کے لیے ’ایکس‘ پر جذباتی پیغام لکھا ہے۔ وہ لکھتے ہیں کہ ’’ہر گزرتے لمحہ کے ساتھ، لیے گئے ہر فیصلے کے ساتھ مجھے ہماری ہندوستانی فوج، ہندوستانی فضائیہ اور ہندوستانی بحریہ پر بہت فخر محسوس ہوتا ہے۔ ہمارے جنگجو ہمارے ملک کے وقار کے لیے کھڑے ہیں۔ ہر ہندوستانی کے لیے یہ ضروری ہے کہ وہ کسی بھی جھوٹی خبر پر بھروسہ نہ کرے۔ سبھی لوگ محفوظ رہیں۔‘‘ اس پوسٹ میں انھوں نے ’آپریشن سندور‘ اور ’جئے ہند‘ ہیش ٹیگ بھی لگایا ہے۔
مایہ ناز ہندوستانی کرکٹر وراٹ کوہلی نے انسٹاگرام پر اسٹوری کے ذریعہ اپنے جذبات سامنے رکھے ہیں۔ انھوں نے لکھا ہے کہ ’’ہم اس مشکل وقت میں اپنی فوج کے ساتھ کھڑے ہیں۔ ہم انھیں سلام کرتے ہیں۔ ہم اپنے ہیروز کی بے پناہ بہادری کے لیے ہمیشہ ان کے قرض دار رہیں گے اور ہمارے ملک کے لیے ان کے اور ان کے کنبوں کے ذریعہ کی گئی قربانیوں کے لیے دل کی گہرائیوں سے شکرگزار ہیں۔ جئے ہند۔‘‘
مذکورہ بالا کرکٹرس کے علاوہ بھی کئی کرکٹرس نے اپنے اپنے الفاظ میں ہندوستانی فوج کی حوصلہ افزائی کی ہے۔ مثلاً سوریہ کمار یادو نے انسٹاگرام اسٹوری میں لکھا ہے کہ ’’ہمیں اپنی فوج اور ان کی بہادری پر بہت فخر ہے۔ آپ ہی کی وجہ سے ہم محفوظ اپنے گھروں میں رہ پاتے ہیں۔ سرحدوں پر ہماری حفاظت کرنے میں آپ کی طاقت اور عزائم کو سلام۔‘‘ اسی طرح سابق کرکٹر شکھر دھون نے ’ایکس‘ پر ’بھگوت گیتا‘ کا ایک شلوک لکھا ہے۔ وہ لکھتے ہیں کہ ’’آپ نے امن قائم کرنے کے لیے جو کچھ بھی کر سکتے تھے، کیا۔ اب جاؤ، انھیں وہ جنگ دو، جو وہ چاہتے ہیں۔‘‘
