پاکستان کے لاہور واقع علامہ اقبال بین الاقوامی ہوائی اڈہ پر 26 اپریل کو آگ لگنے کا واقعہ پیش آیا، جس نے وہاں افرا تفری کا ماحول پیدا کر دیا۔ مشکل حالات کو دیکھتے ہوئے سبھی پروازوں کو روک دیا گیا ہے۔ میڈیا رپورٹس میں بتایا جا رہا ہے کہ لاہور ایئرپورٹ پر پاکستانی فوج کا ایک طیارہ لینڈ کر رہا تھا، تبھی اس کے ایک ٹائر میں آگ لگ گئی۔ یہ حادثہ صبح تقریباً 10 بجے پیش آیا۔
آگ پر قابو پانے کے لیے فائر بریگیڈ کی گاڑیاں فوری طور پر موقع پر پہنچیں اور حالات کو سنبھالنے کی کوشش کی۔ حادثہ کی وجہ سے رَنوے کو عارضی طور پر بند کر دیا گیا ہے، جس سے طیاروں کے پرواز اور لینڈنگ میں رخنہ اندازی پیدا ہو گئی ہے۔ اس حادثہ کے بعد مسافروں کو کئی طرح کے مسائل کا سامنا کرنا پڑا ہے۔ حالانکہ حادثہ میں کسی جانی نقصان کی خبر نہیں ہے۔
جائے وقوع کی جو ویڈیوز اور تصویریں سامنے آ رہی ہیں، اس میں ایئرپورٹ پر دھواں دیکھا جا سکتا ہے۔ اس کے علاوہ لوگوں میں افرا تفری بھی دیکھنے کو مل رہی ہے۔ اس سلسلے میں فی الحال کوئی جانکاری نہیں دی گئی ہے کہ ایئرپورٹ پر معمول کے مطابق پروازیں کب سے شروع ہوں گی۔ اس بے خبری کے سبب ہزاروں مسافروں کو پریشانیوں کا سامنا کرنا پڑ رہا ہے۔
مقامی میڈیا رپورٹس کے مطابق لاہور ہوائی اڈہ نے اعلان کیا ہے کہ فی الحال کوئی بھی فلائٹ پرواز نہیں بھرے گی اور جن پروازوں کو اترنا تھا، انھیں بھی اپنا راستہ بدلنے اور دوسری جگہ جانے کا حکم دیا گیا ہے۔ ابھی تک یہ بھی نہیں پتہ چل سکا ہے کہ طیارہ کے پہیے میں آگ کس طرح لگی۔ حادثہ کی تحقیقات شروع ہو گئی ہے اور امید کی جا رہی ہے کہ آگ کی وجہ جلد سامنے آ جائے گی۔
