تعلیمی اداروں میں خوف کا راج، سوال پوچھنا جرم، خاموشی ہی نجات؟

ایک زمانہ تھا جب ہندوستان کی جامعات سوال اٹھانے، تحقیق کرنے اور فکری مباحثے کا گہوارہ سمجھی جاتی تھیں۔ مگر آج وہی ادارے ایسے مقامات میں تبدیل ہو چکے ہیں جہاں اساتذہ کے قلم پر بھی پہرہ ہے اور طالب علموں کی سوچ پر بھی نگرانی۔ میرٹھ کی چودھری چرن سنگھ (سی سی ایس) یونیورسٹی سے وابستہ میرٹھ کالج میں پیش آنے والا حالیہ واقعہ — جہاں ایک پروفیسر کو صرف اس بنیاد پر امتحانی کام سے محروم کر دیا گیا کہ سوالیہ پرچے میں راشٹریہ سویم سیوک سنگھ (آر ایس ایس) سے متعلق ایک آپشن پر بعض گروپوں کو اعتراض ہو گیا — محض ایک معمولی واقعہ نہیں، بلکہ پورے تعلیمی نظام اور فکری آزادی پر ایک کاری ضرب ہے۔

یہ کیسا معاشرہ ہے جہاں سوالات سے خوف محسوس کیا جاتا ہے، اور وہ بھی ایک ایسی تنظیم کی طرف سے جو خود کو سب سے منظم اور ’قوم پرست‘ کہتی ہے؟ اگر کوئی تنظیم واقعی اتنی توانا ہے تو اسے سوالات سے ڈرنے کی کیا ضرورت؟ کیا طاقتور ہونا عدم برداشت کی سند بن چکا ہے؟

یہ ایک کثیر جوابی سوال (ایم سی کیو) تھا، جس میں صرف ایک جواب درست ہوتا ہے۔ باقی آپشنز لازماً غلط یا مبالغہ آمیز بھی ہو سکتے ہیں۔ تو پھر کیا ہم اس بنیاد پر سزا سنائیں گے کہ آپشن میں کچھ قابل اعتراض تھا؟ اگر ہاں، تو پھر ہمیں ہر پرچہ، ہر نصاب اور ہر کتاب پر پابندی لگانی ہو گی۔

علمی برادری کی بے بسی بھی افسوسناک ہے۔ اساتذہ، محققین اور مؤرخین خاموش ہیں، کیونکہ وہ جانتے ہیں کہ زبان کھولی تو روزی چلی جائے گی۔ طلبہ کی تنظیمیں یا تو حکومت کے ہمنوا ہیں یا خوف زدہ۔ ایسے میں جو تھوڑے بہت ذی شعور لوگ باقی ہیں، وہ بھی دفاعی انداز میں اپنے جملے لکھتے ہیں، ہر سطر کے بعد وضاحت دیتے ہیں کہ ’ہم کسی کی دل آزاری نہیں چاہتے۔‘

لیکن سوال یہ ہے، اگر سچ بولنے پر بھی معذرت کرنی پڑے تو تحقیق کا کیا فائدہ؟ اگر سوال پوچھنے پر بھی سزا ہو تو تعلیم کا کیا مقصد؟

ہمیں یہ سوچنا ہو گا کہ کیا تعلیمی اداروں کو نظریاتی تربیت گاہوں میں تبدیل کیا جا رہا ہے؟ کیا یونیورسٹیاں اب صرف وہی سچ مانیں گی جو حکومت کو منظور ہو؟ کیا طالب علم اب تاریخ کو کتابوں سے نہیں بلکہ سیاسی منشوروں سے سیکھیں گے؟

حکومتیں آتی جاتی رہتی ہیں، مگر علم، سوال، تحقیق اور آزادی ٔ رائے وہ بنیادیں ہیں جو کسی بھی معاشرے کی شناخت بناتی ہیں۔ اگر ان بنیادوں پر سیاست ہونے لگی، اور ہر استاد کو شک کی نظر سے دیکھا جانے لگا، تو ذہنوں کا ارتقاء رک جائے گا۔ اور جس دن ذہن رک جائیں، وہ دن قوم کی تنزلی کا آغاز ہو گا۔

آج وقت ہے کہ اہلِ قلم، اہلِ دانش اور تعلیمی ادارے مل کر یہ سوال اٹھائیں، کیا ہم سوال سے ڈرنے لگے ہیں؟ کیا تعلیم کا مقصد صرف تائید ہے یا تحقیق بھی؟ اور کیا ہم واقعی ایسے ملک میں رہ رہے ہیں جہاں ایک آپشن بھی اقتدار کو ہلا دیتا ہے؟ اگر ان سوالات کا جواب ’خاموشی‘ ہے، تو سمجھ لیجیے کہ نقصان صرف ایک استاد کا نہیں، پوری قوم کا ہے۔