متھرا: اتر پردیش کے متھرا میں یمنا ایکسپریس وے پر دیر رات ایک انتہائی دردناک سڑک حادثہ پیش آیا، جہاں ایک تیز رفتار کنٹینر نے سڑک کنارے کھڑے بس مسافروں کو کچل دیا۔ اس حادثے میں6افراد کی موقع پر ہی موت ہو گئی، جب کہ ایک مسافر شدید طور پر زخمی ہو گیا ہے، جس کی حالت نازک بتائی جا رہی ہے۔یہ افسوسناک حادثہ تھانہ سریر کے علاقے میں یمنا ایکسپریس وے کے مائل اسٹون 88 کے قریب پیش آیا۔ ابتدائی معلومات کے مطابق، ایک سلیپر بس نوئیڈا سے فرخ آباد جا رہی تھی۔ دورانِ سفر بس میں سوار کچھ مسافر لَغو حاجت کے لیے بس سے اترے تھے۔ اسی دوران چند دیگر مسافر بھی بس سے نیچے اتر کر سڑک پر کھڑے ہو گئے۔
اسی وقت ایک تیز رفتار کنٹینر بے قابو ہو کر آیا اور سڑک پر کھڑے مسافروں کو ٹکر مار دی۔ حادثہ اس قدر اچانک اور شدید تھا کہ مسافروں کو سنبھلنے یا خود کو بچانے کا موقع تک نہ مل سکا اور کنٹینر انہیں روندتا ہوا آگے نکل گیا۔ اس دل دہلا دینے والے حادثے میں چھ افراد نے موقع پر ہی دم توڑ دیا جبکہ ایک مسافر شدید زخمی ہو گیا۔حادثے کے بعد جائے وقوعہ پر چیخ و پکار مچ گئی۔ آس پاس کے لوگ فوری طور پر مدد کے لیے دوڑ پڑے اور کچھ ہی دیر میں بڑی تعداد میں بھیڑ جمع ہو گئی۔ واقعے کی اطلاع ملتے ہی پولیس اور انتظامیہ کی ٹیم موقع پر پہنچی اور راحت و بچاؤ کا کام شروع کیا گیا۔ زخمی مسافر کو فوری طور پر ضلع اسپتال منتقل کیا گیا، جہاں اس کا علاج جاری ہے۔
پولیس کے مطابق اس حادثے میں سونو (42 سال)، دیویش، اسلم (27 سال)، سنتوش (45 سال) اور دو دیگر افراد کی موت ہو گئی ہے، جبکہ اوریا کے رہنے والے شیوکانت دوبے (45 سال) زخمی ہیں۔ پولیس نے تمام لاشوں کو اپنی تحویل میں لے کر پوسٹ مارٹم کے لیے بھیج دیا ہے اور قانونی کارروائی شروع کر دی گئی ہے۔مہلوکین کے اہلِ خانہ کو حادثے کی اطلاع دے دی گئی ہے۔ پوسٹ مارٹم مکمل ہونے کے بعد لاشیں ان کے لواحقین کے حوالے کر دی جائیں گی۔ پولیس حادثے کی وجوہات کی جانچ میں مصروف ہے۔
