دہلی کے ساکیت کورٹ میں 5 جون کی دوپہر پُرتشدد تصادم کا واقعہ پیش آیا، جس میں ایک شخص کی موت ہو گئی ہے۔ میڈیا رپورٹس کے مطابق بوقت دوپہر عدالت کے اندر پیشی کے لیے آئے 2 گروپوں میں شدید تصادم ہو گیا۔ اس تصادم میں امن نامی ایک قیدی کا قتل کر دیا گیا۔ پولیس موقع پر پہنچ گئی ہے اور معاملے کی تفتیش کر رہی ہے۔
عدالت کے اندر پیش آئی خونی واردات سے وہاں موجود لوگ خوف میں ہیں۔ پُرتشدد تصادم دیکھنے والے لوگ گھبراہٹ میں عدالت سے باہر نکل گئے۔ بتایا جا رہا ہے کہ تہاڑ کے جیل نمبر 8 سے پیشی کے لیے 3 قیدیوں کو بروز جمعرات ساکیت کورٹ میں لایا گیا تھا۔ تینوں کو ایک لاک اَپ میں بند کر دیا گیا تھا۔ ان 3 قیدیوں میں 2 ایک گروپ سے تھے، اور تیسرا قیدی دوسرے گروپ سے تعلق رکھتا تھا۔ اچانک دونوں گروپوں کے قیدیوں میں تصادم شروع ہو گیا، جس میں امن نامی قیدی سنگین طور پر زخمی ہو گیا۔ آناً فاناً اسے اسپتال لے جایا گیا، جہاں اس کی موت ہو گئی۔
دہلی پولیس کا کہنا ہے کہ مہلوک قیدی کی لاش کو قبضے میں لے کر پوسٹ مارٹم کے لیے بھیج دیا گیا ہے۔ دیگر دونوں قیدیوں سے پوچھ تاچھ کی جا رہی ہے۔ واقعہ کی جانکاری ملتے ہی پولیس ٹیم فوراً موقع پر پہنچ گئی تھی اور کارروائی شروع کر دی گئی۔ پولیس نے بتایا کہ مہلوک قیدی امن کا دونوں قیدیوں سے کسی بات پر تنازعہ چل رہا تھا۔ جیل سے ہی دونوں گروپوں کی آپس میں ناراضگی تھی۔
پولیس کے مطابق بروز جمعرات تینوں قیدیوں کو ایک ساتھ پیشی کے لیے ساکیت کورٹ لایا گیا تھا۔ پیشی سے قبل ایک ہی لاک اَپ میں تینوں کو بند کر دیا گیا تھا۔ لاک اَپ میں ہی ان کا پرانی رنجش پر تنازعہ ہو گیا۔ تنازعہ اتنا بڑا کہ ایک گروپ کے 2 قیدیوں نے امن پر حملہ کر دیا۔ حملے میں امن سنگین طور سے زخمی ہو گیا۔ سیکورٹی اہلکار فوراً اسے اسپتال لے گئے، جہاں ڈاکٹروں نے اسے مردہ قرار دے دیا۔
