سلمان خان کی سکیورٹی میں پھر چوک! دو دن میں دو افراد کی غیر قانونی طور پر ’گلیکسی اپارٹمنٹ‘ میں داخلے کی کوشش

معروف اداکار سلمان خان کی ممبئی کے باندرہ علاقے میں واقع رہائش گاہ ’گلیکسی اپارٹمنٹ‘ میں دو دن کے اندر اندر دو الگ الگ افراد نے غیر قانونی طور پر داخل ہونے کی کوشش کی، جس کے بعد ان کی سکیورٹی پر ایک بار پھر سوال اٹھنے لگے ہیں۔ ان میں سے ایک واقعہ بدھ کے روز پیش آیا، جب ایک 36 سالہ خاتون ایشا چھابڑا بغیر اجازت بلڈنگ میں داخل ہو گئی اور سلمان خان کے فلیٹ تک پہنچ گئی۔ پولیس نے فوری کارروائی کرتے ہوئے خاتون کو حراست میں لے لیا اور اس کے خلاف غیر قانونی داخلے کا مقدمہ درج کر لیا ہے۔

اس واقعے کے ایک دن پہلے بھی ایسا ہی ایک واقعہ پیش آیا تھا، جب چھتیس گڑھ کے رہنے والے جتیندر کمار سنگھ نامی ایک شخص نے سلمان خان سے ملنے کی خواہش میں زبردستی گلیکسی اپارٹمنٹ میں گھسنے کی کوشش کی۔ پولیس کے مطابق یہ واقعہ 20 مئی کو شام 7:15 بجے پیش آیا۔ جتیندر پہلے صبح کے وقت بلڈنگ کے آس پاس گھومتا نظر آیا تھا، جس پر سکیورٹی اہلکار نے اسے وہاں سے ہٹنے کو کہا۔ اس دوران اس نے غصے میں آ کر اپنا موبائل فون زمین پر پھینک کر توڑ دیا۔

سلمان خان کو ماضی میں لارنس بشنوئی گینگ کی جانب سے کئی بار جان سے مارنے کی دھمکیاں مل چکی ہیں۔ ان کے گھر کے باہر فائرنگ کا واقعہ بھی ہو چکا ہے، جس کے بعد حکومتِ مہاراشٹر نے ان کی سکیورٹی میں اضافہ کیا تھا۔ اس وقت سلمان خان کی رہائش گاہ کے باہر پولیس جوان تعینات ہیں، اس کے باوجود مسلسل دو دن میں دو افراد کا اندر گھسنے کی کوشش کرنا سکیورٹی کے لیے سنگین چیلنج بن گیا ہے۔

ریاست مہاراشٹر کے وزیرِ مملکت برائے داخلہ، یوگیش قدم نے اس واقعے پر تشویش کا اظہار کرتے ہوئے کہا ہے کہ سلمان خان کی جان کو فی الحال کوئی خطرہ نہیں ہے ، اور سکیورٹی ایجنسیاں پوری طرح چوکنا ہیں۔ تاہم، بار بار ہونے والے ان واقعات نے سلمان خان کے مداحوں میں بھی بے چینی پیدا کر دی ہے۔