یونیسکو کے ’میموری آف دی ورلڈ رجسٹر‘ میں ’بھگوت گیتا‘ اور بھرت مُنی کے ’ناٹیہ شاستر‘ کو شامل کیے جانے پر ہندوستانی وزیر اعظم نریندر مودی نے انتہائی خوشی کا اظہار کیا ہے۔ انھوں نے اسے دنیا بھر میں ہر ہندوستانی کے لیے فخر کا لمحہ قرار دیا۔ مرکزی وزیر برائے ثقافت و سیاحت گجیندر سنگھ شیخاوت نے بھی اس خبر پر مسرت کا اظہار کیا۔
وزیر اعظم نریندر مودی نے سوشل میڈیا پلیٹ فارم ’ایکس‘ پر اپنی خوشی ظاہر کرتے ہوئے لکھا ہے کہ ’’دنیا بھر میں پھیلے ہر ہندوستانی کے لیے یہ فخر کا لمحہ ہے۔ یونسیکو کے میموری آف دی ورلڈ رجسٹر میں گیتا اور ناٹیہ شاستر کو شامل کیا جانا ہماری دانشمندی اور خوشحال ثقافت کی عالمگیر تصدیق ہے۔‘‘ انھوں نے مزید لکھا ہے کہ ’’گیتا اور ناٹیہ شاستر نے صدیوں سے تہذیب اور شعور کی پرورش کی ہے۔ ان کا مواد دنیا کو ترغیب دیتا رہتا ہے۔‘‘
مرکزی وزیر گجیندر سنگھ شیخاوت نے اس تعلق سے سوشل میڈیا پر لکھا ہے کہ ہندوستانی وراثت کے لیے یہ تاریخی لمحہ ہے۔ شریمد بھگوت گیتا اور بھرت مُنی کے ناٹیہ شاستر کو یونسیکو کے میموری آف دی ورلڈ رجسٹر میں شامل کیا گیا ہے۔ یہ عالمی اعزاز ہندوستان کی ابدی حکمت اور فنی صلاحیت کا جشن منانے والا ہے۔ گجیندر سنگھ یہ بھی لکھتے ہیں کہ بھگوت گیتا ایک مشہور مذہبی کتاب اور روحانی راہنما ہے۔ ناٹیہ شاستر فن مظاہرہ پر ایک قدیم کتاب ہے۔ یہ طویل مدت سے ہندوستان کی فکری و ثقافتی شناخت کا اہم ستون ہے۔
قابل ذکر ہے کہ 17 اپریل کو یونسیکو نے اپنے میموری آف دی ورلڈ رجسٹر میں 74 نئے دستاویزی وراثتوں کو جوڑا ہے۔ اس قدم کے بعد مجموعوں کی تعداد 570 ہو گئی۔ اس رجسٹر میں 72 ممالک اور 4 بین الاقوامی اداروں کے سائنسی انقلاب، تاریخ میں خواتین کا تعاون اور کثیر فریقیت کی اہم حصولیابیوں پر اندراجات شامل کیے گئے ہیں۔ یونسیکو کا میموری آف دی ورلڈ رجسٹر دنیا کے کئی اہم دستاویزات کی فہرست ہے۔ اس میں دستاویزی وراثتوں کو بین الاقوامی مشاورتی کمیٹی کی سفارش اور کارگزار بورڈ کی منظوری سے منتخب کیا جاتا ہے۔
