سنبھل کی شاہی جامع مسجد کا نام تبدیل! اے ایس آئی کے ذریعہ بھیجے گئے سائن بورڈ سے ہلچل

اتر پردیش کے سنبھل واقع مشہور شاہی جامع مسجد ایک بار پھر سرخیوں میں ہے۔ اس مرتبہ شاہی جامع مسجد کسی بیان کی وجہ سے سرخیوں میں نہیں ہے، بلکہ نئے نام کی وجہ سے ہے۔ یہ نیا نام اے ایس آئی کی طرف سے بھیجے گئے ایک نئے سائن بورڈ میں لکھا گیا ہے، جس نے لوگوں میں ہلچل مچا دی ہے۔ سائن بورڈ میں مسجد کو اس کے مشہور نام ’شاہی جامع مسجد‘ کی جگہ ’جمعہ مسجد‘ لکھا گیا ہے۔ بتایا جا رہا ہے کہ جلد ہی یہ سائن بورڈ مسجد میں لگایا جائے گا۔

میڈیا رپورٹس کے مطابق اے ایس آئی نے دستاویزوں کا حوالہ دیتے ہوئے مسجد کا اصل نام ’جمعہ مسجد‘ بتایا ہے۔ اے ایس آئی کا دعویٰ ہے کہ نیا سائن بورڈ ان کے ریکارڈ میں درج نام کے مطابق ہے۔ اس نئے نام سے ایک نیا تنازعہ شروع ہونے کا امکان ہے۔ یہ مسجد پہلے سے ہی تنازعات میں ہے، کیونکہ عدالت میں داخل ایک عرضی میں اس کے ہندو مندر ہونے کا دعویٰ کیا گیا ہے۔ گزشتہ سال اس مسجد میں ہوئے سروے کے دوران بھی تشدد ہوا تھا۔