رام مندر ٹرسٹ کے پہلے سی ای او بنے سابق ایئر مارشل جتیندر مشرا، سنبھالیں گے مندر کی انتظامی ذمہ داری

ایودھیا: ایودھیا کے شری رام جنم بھومی مندر کی انتظامی اور آپریشنل نظام کو مزید منظم کرنے کی سمت میں شری رام جنم بھومی تیرتھ شیتر ٹرسٹ نے بڑا قدم اٹھایا ہے۔ ٹرسٹ نے بدھ کے روز ہندوستانی فضائیہ کے ریٹائرڈ ایئر مارشل جتیندر مشرا کو مندر کا پہلا چیف ایگزیکٹو آفیسر (سی ای او) مقرر کیا۔ طویل فوجی تجربے اور بڑے اداروں کے انتظام میں مہارت رکھنے والے مشرا اب رام مندر کے روزمرہ انتظامی امور، عقیدت مندوں کی سہولیات اور مختلف ایجنسیوں کے درمیان تال میل کی ذمہ داری سنبھالیں گے۔ سی ای او کے انتخاب کے لیے تشکیل دی گئی کمیٹی نے ٹرسٹ کو تین ناموں کا پینل سونپا تھا۔ ان میں اتر پردیش پولیس کے سابق آئی پی ایس افسر راجیش پانڈے، بہار کے سابق ڈی جی پی ڈاکٹر پریش سکسینہ اور سابق آئی اے ایس دنیش چندر کے نام بھی شامل تھے۔

ٹرسٹ نے جتیندر مشرا کے نام پر لگائی مہر

ٹرسٹ نے غور و خوض کے بعد جتیندر مشرا کے نام کی منظوری دی۔ جتیندر مشرا ہندوستانی فضائیہ میں تقریباً چار دہائیوں تک مختلف اہم عہدوں پر فائز رہے ہیں۔ انہوں نے 6 دسمبر 1986 کو فائٹر پائلٹ کی حیثیت سے ہندوستانی فضائیہ میں کمیشن حاصل کیا تھا۔ اپنے فوجی کیریئر کے دوران انہوں نے مختلف اقسام کے 18 سے زائد طیارے اڑائے اور 3,000 گھنٹے سے زیادہ پرواز کا تجربہ حاصل کیا۔ جتیندر مشرا ہندوستانی فضائیہ کی مغربی فضائی کمان کے ایئر آفیسر کمانڈنگ ان چیف بھی رہ چکے ہیں۔ اس کے علاوہ انہوں نے انٹیگریٹڈ ڈیفنس اسٹاف میں ڈپٹی چیف (پالیسی، آرگنائزیشن اینڈ ٹریننگ) سمیت کئی اہم ذمہ داریاں سنبھالی ہیں۔ انہیں آپریشنز، اسٹریٹجک منصوبہ بندی، قیادت اور مختلف ایجنسیوں کے درمیان تال میل کا وسیع تجربہ حاصل ہے۔

آپریشن سندور کے دوران بھی اہم ذمہ داری سنبھالی

ایئر مارشل جتیندر مشرا کا فوجی کیریئر اسٹریٹجک اور حساس ذمہ داریوں سے وابستہ رہا ہے۔ وہ ہندوستانی فضائیہ کی مغربی فضائی کمان کی قیادت کر چکے ہیں۔ آپریشن سندور کے دوران بھی مغربی کمان کی اہم ذمہ داری ان کے پاس تھی۔ ایسے میں سکیورٹی، آپریشنز اور مختلف اداروں کے درمیان تال میل کا ان کا تجربہ ایودھیا میں نئی ذمہ داری کے لحاظ سے اہم سمجھا جا رہا ہے۔