ہاتھ میں ترنگا تھام کر بین الاقوامی خلائی اسٹیشن پر موجود روسی عملے نے یوم آزادی سے قبل بھارت کو دی مبارکباد

نئی دہلی: بین الاقوامی خلائی اسٹیشن (آئی ایس ایس) پر موجود روسی خلائی مسافروں نے بھارت کے 80ویں یومِ آزادی کے موقع پر بھارتی عوام کو خصوصی مبارکباد پیش کی۔ انہوں نے بھارتی ترنگا ہاتھ میں تھام کر دونوں ممالک کے درمیان خلائی تحقیق کے شعبے میں دیرینہ شراکت داری کو اجاگر کیا۔ ایک ویڈیو پیغام میں روسی خلائی مسافروں نے بھارت کو یومِ آزادی کی مبارکباد دیتے ہوئے ماسکو اور نئی دہلی کے درمیان کئی دہائیوں پر محیط تعاون کو یاد کیا۔ انہوں نے خلائی تحقیق کو دونوں ممالک کے باہمی تعلقات کا ایک اہم ستون قرار دیا۔ خلائی مسافر پیوتر دوبروف نے کہا ’’پیارے دوستو، آج جمہوریہ بھارت اپنا 80واں یوم آزادی منا رہا ہے۔‘‘ انہوں نے بھارتی عوام کے لیے امن اور خوشحالی کی خواہشات پیش کیں۔

آریہ بھٹ سے شروع ہوئی خلائی شراکت داری

روسی خلائی مسافروں نے یومِ آزادی کی تقریبات کو انسانی خلائی پرواز کی ایک اہم سالگرہ سے بھی جوڑا۔ رواں سال سوویت خلائی مسافر یوری گاگارین کے خلا میں جانے کے 65 سال بھی مکمل ہو رہے ہیں۔ گاگارین نومبر 1961 میں بھارت آئے تھے اور بھارت و سوویت یونین کے درمیان مضبوط ہوتی دوستی کی ابتدائی علامت بن گئے تھے۔ روسی خلائی مسافروں نے گاگارین کے بھارت کے بارے میں مشہور تاثر کا حوالہ دیتے ہوئے کہا کہ خلا سے یہ ملک خوبصورت دکھائی دیتا ہے، لیکن زمین پر یہ اس سے بھی زیادہ خوبصورت ہے، کیونکہ یہ ’’سچے دوستوں‘‘ کا وطن ہے۔ روسی خلائی مسافروں نے بھارت اور روس کے درمیان خلائی تعاون کی طویل تاریخ کا بھی ذکر کیا۔ دونوں ممالک کے درمیان خلائی تعاون کا آغاز 1975 میں سوویت یونین کی جانب سے بھارت کے پہلے سیٹلائٹ ’آریہ بھٹ‘ کی لانچنگ کے ساتھ ہوا تھا۔ تقریباً ایک دہائی بعد 1984 میں راکیش شرما سوویت خلائی جہاز ’سویوز ٹی-11‘ کے ذریعے خلا میں جانے والے پہلے بھارتی بنے۔ اس تاریخی کامیابی نے دونوں ممالک کے خلائی تعلقات کو مزید مضبوط کیا۔

گگن یان سے تعلقات کو نئی سمت

روسی خلائی مسافر انا ککینا نے کہا کہ بھارت اور روس کی خلائی شراکت داری اب ایک نئے مرحلے میں داخل ہو چکی ہے، جس میں بھارت کا انسانی خلائی پرواز کا پروگرام ’گگن یان‘ خاص اہمیت رکھتا ہے۔ بھارتی خلائی مسافر، جنہیں ’گگن یاتری‘ کہا جاتا ہے، بھارت کے پہلے انسانی خلائی مشن کی تیاری کے لیے روس میں واقع یوری گاگارین کاسموناٹ ٹریننگ سینٹر میں تربیت حاصل کر چکے ہیں۔ پیغام میں روس کی خلائی ایجنسی روسکوسموس، بھارت میں اس کے دفتر اور بھارتی خلائی تحقیقاتی تنظیم (اسرو) کی جانب سے خلائی تعاون کے حوالے سے منعقد کیے گئے ایک مشترکہ مقابلے کا بھی ذکر کیا گیا۔ مقابلے میں کامیاب ہونے والی تخلیقات کو یومِ آزادی کی مبارکباد کے پیغام کے ساتھ نمائش کے لیے پیش کیا گیا۔ خلائی مسافر آندرے فیدیا یف نے خلائی اسٹیشن پر بھارتی پرچم بلند کرتے ہوئے کہا، ’’بھارت روس دوستی زندہ باد۔‘‘