ڈیجیٹل گرفتاری فراڈ کے خلاف سی بی آئی کی 16 ریاستوں میں 80 سے زائد مقامات پر چھاپہ کارروائیاں، دو افراد گرفتار

نئی دہلی: مرکزی تفتیشی بیورو (سی بی آئی) نے ڈیجیٹل گرفتاری (ڈیجیٹل اریسٹ) فراڈ کے خلاف بڑے کریک ڈاؤن کے تحت آپریشن چکر-6 شروع کرتے ہوئے 16 ریاستوں میں 80 سے زائد مقامات پر بیک وقت چھاپہ کارروائیاں کیں۔ سی بی آئی کے مطابق اس کارروائی کے لیے 60 خصوصی ٹیمیں تشکیل دی گئیں، جنہوں نے پنجاب، گجرات، دہلی، مہاراشٹر، ہریانہ، تمل ناڈو، تلنگانہ، آندھرا پردیش، اتر پردیش، مدھیہ پردیش، راجستھان، آسام، مغربی بنگال، منی پور، کرناٹک اور اڈیشہ میں تلاشی مہم چلائی۔ تحقیقات کے دوران چنئی اور کولکاتا سے دو افراد کو گرفتار کیا گیا، جن پر مبینہ طور پر شیل کمپنیاں قائم کرنے اور فرضی (میول) بینک کھاتوں کے ذریعے سائبر فراڈ کی رقم منتقل کرنے کا الزام ہے۔

جعلی سپریم کورٹ ویب سائٹ اور فرضی عدالتی احکامات کا انکشاف

سی بی آئی نے بتایا کہ حال ہی میں اسے ایک ایسی جعلی ویب سائٹ کا سراغ ملا، جس کا یو آر ایل بھارت کی سپریم کورٹ کی سرکاری ویب سائٹ سے انتہائی مشابہ تھا۔ مبینہ طور پر جعلساز اسی جعلی ڈومین کا استعمال کرتے ہوئے لوگوں کو ’’ڈیجیٹل گرفتاری‘‘ کا خوف دکھا کر دھوکہ دیتے تھے۔ سپریم کورٹ کی رجسٹری سے موصول ہونے والی شکایت کی بنیاد پر سی بی آئی نے ایف آئی آر درج کر کے تحقیقات شروع کیں۔ جدید فرانزک ٹیکنالوجی اور تکنیکی مہارت کی مدد سے تحقیقاتی ایجنسی نے بھارت اور بیرونِ ملک سرگرم مجرمانہ نیٹ ورک کے اہم عناصر کی نشاندہی کی۔ تحقیقات سے معلوم ہوا کہ ملزمان جعلی عدالتی احکامات اور قانون نافذ کرنے والے اداروں کے فرضی دستاویزات تیار کر کے انہیں آن لائن اپ لوڈ کرتے تھے تاکہ اپنی دھوکہ دہی کو معتبر ظاہر کیا جا سکے۔

دو کروڑ روپے کی منی لانڈرنگ، غیر ملکی شہری بھی نشانہ بنے

چھاپہ کارروائیوں کے دوران متعدد اہم دستاویزات، ڈیجیٹل آلات، موبائل فون اور بینک لین دین سے متعلق ریکارڈ ضبط کیا گیا، جن کا فرانزک تجزیہ جاری ہے۔ سی بی آئی کے مطابق تحقیقات سے یہ بھی سامنے آیا ہے کہ اس نیٹ ورک نے نہ صرف بھارتی شہریوں بلکہ کئی دیگر ممالک کے شہریوں کو بھی اپنا شکار بنایا۔ متعلقہ ممالک کے قانون نافذ کرنے والے اداروں کو مناسب ذرائع کے ذریعے اس بارے میں آگاہ کیا جا رہا ہے۔ تحقیقات کے مطابق ملزمان نے تقریباً دو کروڑ روپے کی مشتبہ مجرمانہ آمدنی کو فرضی بینک کھاتوں کے ذریعے منتقل کیا۔ سی بی آئی نے کہا ہے کہ وہ سائبر جرائم کے بنیادی ڈھانچے کو ختم کرنے اور ڈیجیٹل فراڈ کے متاثرین کو انصاف دلانے کے لیے اپنی کارروائیاں مسلسل جاری رکھے گی۔