ای-زیرو ایف آئی آر پورے ملک میں نافذ کرنے پر زور، سائبر فراڈ اور ڈیجیٹل اریسٹ پر پی ایم مودی سخت

ئی دہلی :وزیر اعظم نریندر مودی نے سائبر جرائم، ڈیجیٹل فراڈ اور نام نہاد “ڈیجیٹل اریسٹ” جیسے بڑھتے ہوئے خطرات پر سخت مؤقف اختیار کرتے ہوئے ریاستوں کو ہدایت دی ہے کہ سائبر دھوکہ دہی کے معاملات میں فوری کارروائی کے لیے ای-زیرو ایف آئی آر (e-Zero FIR) نظام کے نفاذ کو تیز کیا جائے۔ وزیر اعظم  مودی نے جمعرات کو 52ویں پرگتی اجلاس کی صدارت کرتے ہوئے چار مختلف ریاستوں میں جاری 30 ہزار کروڑ روپے سے زائد مالیت کے چار بڑے بنیادی ڈھانچہ منصوبوں کا جائزہ لیا۔ ان منصوبوں میں سڑک، بجلی، صنعتی راہداری اور میٹرو ریل سے متعلق اسکیمیں شامل ہیں۔

منصوبوں میں تاخیر پر ناراضی

میٹنگ  کے دوران وزیر اعظم مودی  نے واضح طور پر کہا کہ ترقیاتی منصوبوں میں تاخیر نہ صرف لاگت میں اضافہ کرتی ہے، بلکہ عوامی مفادات کو بھی نقصان پہنچاتی ہے۔ انہوں نے تمام متعلقہ محکموں کو ہدایت دی کہ زیر التوا مسائل کو “مشن موڈ” میں حل کیا جائے اور منصوبوں کو مقررہ مدت کے اندر مکمل کیا جائے۔

سائبر جرائم پر سخت موقف

میٹنگ کا سب سے اہم موضوع سائبر فراڈ اور ڈیجیٹل اریسٹ جیسے معاملات رہے، جن پر وزیر اعظم  مودی نے گہری تشویش کا اظہار کیا۔انہوں نے کہا کہ آن لائن پلیٹ فارمز کے غلط استعمال کے ذریعے شہریوں کو دھوکہ دینے کے واقعات میں اضافہ ہو رہا ہے، جسے روکنے کے لیے فوری اور مؤثر اقدامات ضروری ہیں۔وزیر اعظم مودی  نے زور دے کر کہا کہ شہریوں کو اپنی شکایات کے ازالے کے لیے ایک دفتر سے دوسرے دفتر یا ایک ایجنسی سے دوسری ایجنسی کے چکر نہیں لگانے چاہئیں۔ اس کے لیے واضح جوابدہی، فوری ردعمل اور بینکوں، ڈیجیٹل پلیٹ فارمز اور قانون نافذ کرنے والے اداروں کے درمیان مضبوط ہم آہنگی قائم کی جائے۔

ای-زیرو ایف آئی آر جلد نافذ کرنے کی ہدایت

سائبر فراڈ سے ہونے والے مالی نقصانات کو کم کرنے اور عوام کا اعتماد بحال کرنے کے لیے وزیر اعظم نے ریاستی حکومتوں کو ای-زیرو ایف آئی آر نظام جلد نافذ کرنے کی ہدایت دی۔اس نظام کے تحت سائبر جرائم کی شکایت موصول ہوتے ہی فوری طور پر مقدمہ درج کیا جا سکے گا اور ابتدائی کارروائی میں تاخیر نہیں ہوگی، جس سے متاثرہ افراد کے مالی نقصان کو محدود کرنے میں مدد ملے گی۔

ٹی بی مکت بھارت مہم میں اے آئی کے استعمال پر زور

وزیر اعظم نے “ٹی بی مکت بھارت ابھیان” کا بھی جائزہ لیا اور اس قومی مہم میں مصنوعی ذہانت (AI) سمیت جدید ڈیجیٹل ٹیکنالوجیز کے استعمال پر خصوصی زور دیا، تاکہ بیماری کی بروقت شناخت اور علاج کے عمل کو مزید مؤثر بنایا جا سکے۔

پی ایم گتی شکتی پورٹل کو ریئل ٹائم اپ ڈیٹ رکھنے کی ہدایت

بنیادی ڈھانچے کے منصوبوں کی نگرانی کے حوالے سے وزیر اعظم نے پی ایم گتی شکتی نیشنل ماسٹر پلان کے مؤثر استعمال پر زور دیا۔انہوں نے ہدایت دی کہ پورٹل پر منصوبوں کی منظوری، انفراسٹرکچر سے متعلق معلومات اور زمینی صورتحال کو مسلسل اپ ڈیٹ رکھا جائے تاکہ منصوبوں میں پیش آنے والی رکاوٹوں کی پیشگی نشاندہی ہو سکے اور ریئل ٹائم ڈیٹا کی بنیاد پر فوری فیصلے کیے جا سکیں۔وزیر اعظم کا کہنا تھا کہ جدید ٹیکنالوجی، مؤثر رابطہ کاری اور بروقت فیصلہ سازی ہی ترقیاتی منصوبوں اور سائبر سکیورٹی دونوں شعبوں میں بہتر نتائج کی ضمانت دے سکتی ہے۔