جیت اڈانی نے مندرا انٹرنیشنل ایئرپورٹ کا کیا افتتاح، کہا- بہتر فضائی رابطے سے سیاحت اور کاروبار کو ملے گی نئی رفتار

ئی دہلی: اڈانی گروپ کے ڈائریکٹر اور اڈانی ایئرپورٹ ہولڈنگز کے سربراہ جیت اڈانی نے مندرا انٹرنیشنل ایئرپورٹ کے نئے ٹرمینل اور پہلی تجارتی پرواز کا افتتاح کرتے ہوئے کہا ہے کہ گروپ آئندہ پانچ برسوں کے دوران اپنے تمام ہوائی اڈوں پر تقریباً 90 ہزار کروڑ سے ایک لاکھ کروڑ روپے تک کی سرمایہ کاری کرے گا۔ ان کا کہنا تھا کہ یہ سرمایہ کاری بھارت کے ہوا بازی کے شعبے میں گروپ کی طویل مدتی ترقیاتی حکمت عملی کا حصہ ہے۔افتتاحی تقریب کے بعد میڈیا سے گفتگو کرتے ہوئے جیت اڈانی نے کہا کہ اڈانی گروپ ملک کے ایوی ایشن سیکٹر میں اپنی موجودگی مزید مضبوط بنانے کے لیے پرعزم ہے۔ انہوں نے بتایا کہ جب حکومت 11 نئے ہوائی اڈوں کی نجی شعبے کے لیے بولی کا عمل شروع کرے گی تو اڈانی گروپ اس میں بھرپور حصہ لے گا۔انہوں نے کہا، ’’ہم یہ طے نہیں کر رہے کہ 11 میں سے کتنے ہوائی اڈے حاصل کریں گے، لیکن ہمارا مقصد بھارتی ہوا بازی کی معیشت میں اپنا کردار مسلسل بڑھانا ہے۔‘‘

اس موقع پر مندرا ایئرپورٹ نے ممبئی اور گوا کے لیے اپنی پہلی باقاعدہ فضائی سروس کے آغاز کا اعلان بھی کیا۔ یہ سروس اسٹار ایئر کے اشتراک سے شروع کی گئی ہے اور اسے کچھ خطے کے لیے ایک بڑی پیش رفت قرار دیا جا رہا ہے۔ ماہرین کے مطابق اس نئی فضائی رابطہ سروس سے کچھ خطے کی معیشت، کاروباری سرگرمیوں اور لاجسٹکس کے شعبے میں نمایاں بہتری آئے گی۔جیت اڈانی نے بتایا کہ نئے ٹرمینل کی تعمیر ریکارڈ مدت میں مکمل کی گئی ہے۔ ابتدائی مرحلے میں یہاں سے ممبئی، گوا، سورت، ہنڈن اور جلد ہی احمد آباد کے لیے علاقائی پروازیں چلائی جائیں گی۔ انہوں نے اس کامیابی کے لیے منصوبے سے وابستہ ٹیموں اور حکومت ہند کی اُڑان (UDAN) اسکیم کا شکریہ ادا کیا، جس کی بدولت منظوریوں اور فضائی رابطوں کا عمل تیز ہوا۔

انہوں نے کہا کہ مندرا، جو اڈانی گروپ کی ’’کرم بھومی‘‘ ہے، اب بھارت کے دیگر حصوں کے ساتھ زیادہ مؤثر طریقے سے جڑ سکے گا۔ ان کے مطابق اس ایئرپورٹ سے نہ صرف کمپنی کے ملازمین اور کاروباری شراکت داروں کو فائدہ ہوگا بلکہ مقامی معیشت اور سیاحت کو بھی فروغ ملے گا۔جیت اڈانی نے کہا کہ مندرا سے ممبئی تک براہ راست فضائی رابطہ مقامی لوگوں کے لیے بڑی سہولت ثابت ہوگا۔ ماضی میں اس سفر کے لیے کئی مراحل طے کرنا پڑتے تھے، جبکہ اب یہ سفر انتہائی آسان ہو جائے گا۔ انہوں نے امید ظاہر کی کہ براہ راست فضائی رابطے سے مندرا اور اس کے اطراف کے سیاحتی مقامات، خصوصاً منوی بیچ اور ثقافتی ورثے کے مراکز میں سیاحوں کی تعداد بڑھے گی۔

انہوں نے مزید بتایا کہ ابتدائی مرحلے میں علاقائی طیارے استعمال کیے جائیں گے، تاہم مستقبل میں طلب میں اضافے کے ساتھ ایئربس A320 اور بوئنگ 737 جیسے بڑے طیاروں کی آمد بھی ممکن ہوگی۔ ان کے مطابق موجودہ رن وے ان طیاروں کی لینڈنگ کے لیے موزوں ہے اور ضرورت پڑنے پر اسے مزید وسعت بھی دی جا سکتی ہے۔ماہرین کا ماننا ہے کہ مندرا انٹرنیشنل ایئرپورٹ کے آغاز سے گجرات کے صنعتی اور تجارتی شعبے کو نئی توانائی ملے گی اور یہ علاقہ مستقبل میں ایک اہم ملٹی موڈل لاجسٹکس اور بزنس ہب کے طور پر ابھر سکتا ہے۔