ممتا بنرجی اور ابھیشیک بنرجی کی بڑھیں مشکلیں، کلکتہ ہائی کورٹ نے اس معاملے میں بھیجا توہینِ عدالت کا نوٹس

ولکتہ: کلکتہ ہائی کورٹ نے مغربی بنگال کی وزیر اعلیٰ اور ترنمول کانگریس کی صدر ممتا بنرجی اور ان کے بھتیجے ابھیشیک بنرجی کو مبینہ توہینِ عدالت کے معاملے میں نوٹس جاری کرنے کا حکم دیا ہے۔ یہ نوٹس ترنمول کانگریس کی سالانہ ’’شہید دیوس‘‘ ریلی کے سلسلے میں جاری کیا گیا ہے، جو 21 جولائی 2025 کو منعقد کی گئی تھی۔ الزام ہے کہ اس ریلی کے دوران ہائی کورٹ کے 2018 کے اس فیصلے کی خلاف ورزی کی گئی، جس میں تمام سیاسی جماعتوں کو واضح ہدایت دی گئی تھی کہ وہ شہر کی کسی بھی اہم سڑک یا راستے کو مکمل طور پر بند نہ کریں۔

عدالت کا حکم اور اگلی سماعت کی تاریخ

حال ہی میں اس معاملے میں توہینِ عدالت کی ایک عرضی کلکتہ ہائی کورٹ میں دائر کی گئی، جس کی سماعت جسٹس اریجیت بنرجی کی سربراہی والی ڈویژن بنچ کے سامنے ہوئی۔ جمعہ کو ابتدائی سماعت کے بعد ڈویژن بنچ نے حکم دیا کہ ممتا بنرجی اور ابھیشیک بنرجی کو توہینِ عدالت کا نوٹس جاری کیا جائے۔ اس معاملے کی اگلی سماعت تین جولائی کو مقرر کی گئی ہے۔

2018 کے فیصلے میں کیا تھیں ہدایات؟

واضح رہے کہ 2018 میں کلکتہ ہائی کورٹ کی ڈویژن بنچ، جس میں جسٹس جیوتیرمے بھٹاچاریہ اور جسٹس اریجیت بنرجی شامل تھے، نے فیصلہ سنایا تھا کہ کوئی بھی سیاسی جماعت شہر کے مرکزی علاقوں کو مکمل طور پر بند نہیں کرے گی۔ عدالت نے اپنے فیصلے میں کہا تھا کہ سڑک کا ایک حصہ ہمیشہ پیدل چلنے والوں اور گاڑیوں کی آمدورفت کے لیے کھلا رکھا جائے۔ ایمرجنسی صورتِ حال، خصوصاً ایمبولینسوں کی آمدورفت کو یقینی بنانے کے لیے بھی راستہ کھلا رہنا چاہیے۔ ضرورت پڑنے پر ٹریفک کی روانی برقرار رکھنے کے لیے متبادل راستوں کا انتظام بھی کیا جائے۔

پولیس کو بھی دی گئی تھیں ہدایات

ہائی کورٹ نے 2018 میں پولیس کو یہ بھی ہدایت دی تھی کہ وہ ذرائع ابلاغ کے ذریعے عوام کو ٹریفک کے متبادل راستوں کے بارے میں آگاہ کرے۔ اس کے علاوہ عدالت نے کہا تھا کہ اگر کسی سیاسی جلسے یا ریلی کے دوران توڑ پھوڑ یا تشدد کا واقعہ پیش آتا ہے تو ذمہ دار افراد کے خلاف سخت قانونی کارروائی کی جائے گی۔

نئی عرضی میں کیا کیا گیا دعویٰ؟

حال ہی میں ہائی کورٹ میں ایک اور عرضی دائر کی گئی، جس میں دعویٰ کیا گیا ہے کہ گزشتہ سال 21 جولائی کو منعقد ہونے والی ترنمول کانگریس کی ’’شہید دیوس‘‘ ریلی کے دوران 2018 کے عدالتی فیصلے کی خلاف ورزی کی گئی۔ عرضی میں کہا گیا ہے کہ ریلی کے دوران وسطی کلکتہ کے ایسپلینیڈ علاقے میں واقع ایک اہم چوراہے کو مکمل طور پر بند کر دیا گیا تھا، جس کے باعث عام لوگوں کو شدید مشکلات اور آمدورفت میں دشواری کا سامنا کرنا پڑا۔