امت شاہ کا کولہاپور دورہ، مہالکشمی مندر کے لیے بڑی سوغات، چینی صنعت اور سیاست پر اہم فیصلوں کے امکانات

نئی دہلی : مہاراشٹر کی سیاست اور تعاون کے شعبے میں ایک بار پھر سرگرمیاں تیز ہونے جا رہی ہیں۔ مرکزی وزیر داخلہ امت شاہ و وزیرتعاون امت شاہ اپنے اہم دو روزہ دورے کے تحت کولہاپور پہنچ رہے ہیں، جہاں وہ مذہبی، انتظامی اور سیاسی نوعیت کے متعدد پروگراموں میں شرکت کریں گے۔ اس دورے کو ریاست کے گنا کسانوں، چینی صنعت اور تعاون کے شعبے کے لیے خاص اہمیت کا حامل قرار دیا جا رہا ہے۔امت شاہ اپنے دورے کا آغاز کولہاپور کے مشہور شری مہالکشمی مندر سے کریں گے۔ یہاں وہ شری مہالکشمی مندر ترقیاتی منصوبہ کے تحت نئے پردکشنا مارگ  اور دیوتاؤں سے متعلق مندروں کے تحفظ و ترقی کے منصوبوں کا سنگ بنیاد رکھیں گے۔ ضلعی انتظامیہ کے مطابق اس منصوبے سے لاکھوں عقیدت مندوں کو بہتر سہولیات، محفوظ آمدورفت اور عالمی معیار کی زیارت کا تجربہ حاصل ہوگا۔ دورے کے پیش نظر شہر میں سڑکوں کی تزئین و آرائش اور ٹریفک انتظامات کو بھی خصوصی طور پر بہتر بنایا گیا ہے۔

مندر کے دورے کے بعد امت شاہ کی توجہ ریاست کی اہم چینی صنعت اور گنا کسانوں کے مسائل پر مرکوز رہے گی۔ وہ ریاستی وزیر حسن مشریف، ضلع بینک کے عہدیداروں اور چینی صنعت سے وابستہ نمائندوں کے ساتھ اعلیٰ سطحی اجلاس کریں گے۔ ذرائع کے مطابق اجلاس میں گنے کی پیداوار میں اضافے، شوگر ملوں کو درپیش چیلنجز، کم ہوتے کرشنگ سیزن اور کسانوں کی آمدنی بڑھانے جیسے موضوعات پر تفصیلی گفتگو ہوگی۔چینی صنعت سے وابستہ حلقوں کو امید ہے کہ مرکزی حکومت اس شعبے کے لیے نئی مراعات یا امدادی اقدامات کا اعلان کر سکتی ہے۔ مصنوعی ذہانت (اے آئی) کے ذریعے گنے کی پیداوار میں بہتری، جدید زرعی تکنیکوں کے فروغ اور چینی کی قیمتوں کے تعین کے حوالے سے بھی اہم تجاویز زیر غور آ سکتی ہیں۔دورے کا ایک اہم پہلو کولہاپور ضلع بینک کے 112 کروڑ روپے کے اس فنڈ سے متعلق بھی ہے، جو گزشتہ ایک دہائی سے زائد عرصے سے نیشنل بینک فار ایگریکلچراینڈ رورل ڈیولپمنٹ (نابارڈ) کے پاس زیر التوا ہے۔

اس معاملے پرسپریم کورٹ بھی فریقین کو باہمی بات چیت کے ذریعے حل تلاش کرنے کا مشورہ دے چکی ہے۔ امت شاہ کی موجودگی میں اس تنازع کے حل کی امیدیں ایک بار پھر بڑھ گئی ہیں۔اپنے دورے کے دوران امت شاہ کولہاپور کے پولیس پریڈ گراؤنڈ اور اچلکرنجی میں عوامی جلسوں سے بھی خطاب کریں گے۔ بھارتیہ جنتا پارٹی ان جلسوں کو گزشتہ اسمبلی انتخابات میں پارٹی کی کامیابی پر عوام کا شکریہ ادا کرنے کے موقع کے طور پر پیش کر رہی ہے۔ سیاسی مبصرین کے مطابق یہ دورہ نہ صرف ریاستی سیاست میں نئی سرگرمیوں کو جنم دے سکتا ہے، بلکہ تعاون کے شعبے اور چینی صنعت کے مستقبل کے حوالے سے بھی اہم اشارے دے گا۔