بی آر ایس سے معطلی کے بعد کے کویتا نے ایم ایل سی کے عہدے اور

حیدرآباد: بھارت راشٹر سمیتی (بی آر ایس) کے صدر کے چندرشیکھر راؤ (کے سی آر) کی جانب سے مبینہ پارٹی مخالف سرگرمیوں کے سبب معطل کئے جانے کے ایک دن بعد کے کویتا نے پارٹی کے رکن قانون ساز کونسل کے عہدے اور بی آر ایس کی ابتدائی رکنیت سے استعفیٰ دے دیا۔ حیدرآباد کے جوبلی ہلز میں واقع اپنی تنظیم ’تلنگانہ جاگروتی‘ کے مرکزی دفتر میں میڈیا سے بات کرتے ہوئے کویتا نے کہا کہ کچھ لیڈران ان کے خلاف سازش کر رہے ہیں اور ان کے خلاف جھوٹے پروپگنڈہ پر مبنی مہم چلائی جا رہی ہے۔

کویتا نے کہا کہ 103 دن گزرنے کے باوجود پارٹی کے کارگزار صدر تارک راما راو نے ایک بار بھی ان سے بات نہیں کی، حالانکہ وہ خود ان سے سازشوں کی شکایت کر چکی تھیں۔ انہوں نے کہا کہ ایک خاتون ایم ایل سی کو اس طرح پریشان دیکھ کر بھی کے ٹی راما راو نے بھائی ہونے کے ناطے کچھ نہیں کیا۔

کویتا نے کہا کہ وہ پہلے بھی لوگوں کے مسائل اٹھاتی رہی ہیں۔ پارٹی میں جو کچھ ہوا، انہیں سینئر لیڈروں نے سوچنے پر مجبور کیا۔ وہ اپنے والد کی وجہ سے سیاست میں ہیں، جن کا ہاتھ پکڑ کر وہ یہاں تک پہنچیں۔ وہ اپنے والد سے متاثر ہو کر سیاست میں آئیں۔ کے سی آر ہر کمیونٹی سے کیا گیا وعدہ پورا کرنے کی کوشش کر رہے ہیں۔ کچھ لوگ ان کے خلاف غلط پروپیگنڈہ کر رہے ہیں اور ان کی شبیہ کو خراب کر رہے ہیں۔ تلنگانہ کو ایک سماجی پارٹی کی ضرورت ہے۔ اس لیے وہ تلنگانہ سے اہم مسائل اٹھا رہی ہیں۔ کویتا نے کہا کہ جب ان کے خلاف بدنیتی پر مبنی مہم چلائی گئی، تو ان کے بھائی راما راؤ نے ان کا ساتھ نہیں دیا۔

انہوں نے کہا، ’’مجھ پر فرضی مقدمات درج کئے گئے اور پھر میں ساڑھے پانچ مہینے دہلی کی تہاڑ جیل میں قید رہی۔ میں نے اپنے والد کے سی آر کا ہاتھ تھام کر ہی تحریکوں میں حصہ لینا شروع کیا تھا۔ میں پارٹی کارکنان کے ساتھ مل کر اس معاملہ پر آواز بلند کروں گی اور احتجاج کرتی رہوں گی۔‘‘