نئی دہلی: لوک سبھا میں قائد حزب اختلاف اور کانگریس کے سینئر رہنما راہل گاندھی اگلے ہفتے امریکہ کے دو روزہ دورے پر روانہ ہوں گے۔ پارٹی کے مطابق یہ دورہ 21 اور 22 اپریل کو ہوگا، جس دوران راہل گاندھی امریکہ کی معروف براؤن یونیورسٹی میں خطاب کریں گے۔ وہ یونیورسٹی کے فیکلٹی اراکین اور طلبہ سے براہ راست گفتگو بھی کریں گے۔
کانگریس کے میڈیا اور تشہیر کے شعبے کے سربراہ پون کھڑا نے جمعرات کو ایک سوشل میڈیا پوسٹ کے ذریعے اس دورے کی تفصیلات دی۔ انہوں نے پلیٹ فارم ایکس پر بتایا کہ ’’راہل گاندھی 21 اور 22 اپریل کو امریکہ کے ریاست روڈ آئلینڈ میں واقع براؤن یونیورسٹی کا دورہ کریں گے، جہاں وہ خطاب کے علاوہ تعلیمی ماہرین اور طلبہ سے تبادلہ خیال کریں گے۔”
راہل گاندھی کے اس دورے کے دوران وہ امریکہ میں مقیم ہندوستانی برادری کے ارکان سے بھی ملاقات کریں گے۔ ان ملاقاتوں میں انڈین اوورسیز کانگریس (آئی او سی) کے عہدیدار اور کارکن بھی شامل ہوں گے۔ پون کھڑا نے کہا کہ راہل گاندھی کا یہ دورہ عالمی سطح پر تعلیمی اداروں سے تعلق مضبوط کرنے کی کوششوں کا حصہ ہے۔
اس سے قبل کے اپنے دورۂ امریکہ کے دوران انہوں نے بھارتیہ جنتا پارٹی (بی جے پی) اور راشٹریہ سویم سیوک سنگھ (آر ایس ایس) پر تنقید کرتے ہوئے کہا تھا کہ ان تنظیموں کا نظریہ خواتین کو محدود رکھنے کا ہے، جبکہ کانگریس کا ماننا ہے کہ خواتین کو اپنی مرضی کے مطابق ہر میدان میں کام کرنے کی مکمل آزادی ہونی چاہیے۔
راہل گاندھی کے اس نئے دورے سے نہ صرف تعلیمی اداروں سے تعلقات مضبوط ہوں گے بلکہ امریکہ میں مقیم ہندوستانی برادری تک بھی کانگریس کی رسائی بڑھے گی۔ کانگریس کی قیادت کو امید ہے کہ یہ دورہ سیاسی اور تعلیمی دونوں سطحوں پر مثبت اثر ڈالے گا۔
