’’اسکول ٹھیک کرو‘ مہم کی کیوں ہو امتی ہے مخالفت…‘‘؟ ہم طلبہ کی ’اے ٹیم‘ ہیں، ابھیجیت دپکے کا بی جے پی پر حملہ

نئی دہلی: کاکروچ جنتا پارٹی کے صدر ابھیجیت دپکے نے جمعرات کے روز میڈیا سے گفتگو کے دوران ’اسکول ٹھیک کرو‘ مہم کو لے کر بی جے پی کو نشانہ بنایا۔ انہوں نے کہا کہ بہتر اسکول اور تعلیم کا مسئلہ کسی ایک سیاسی جماعت یا تنظیم تک محدود نہیں ہے، بلکہ یہ ملک کے ہر بچے کے مستقبل سے جڑا ہوا سوال ہے۔

اچھے اسکول ملک کے مستقبل کے لیے ضروری

ابھیجیت دپکے نے کہا کہ عام آدمی پارٹی کے ساتھ ساتھ مہاراشٹر میں شیوسینا اور این سی پی بھی اسکولوں کو بہتر بنانے کی بات کر رہی ہیں۔ ایسے میں جو بھی لوگ چاہتے ہیں کہ ملک کے اسکول بہتر ہوں، ان کا خیرمقدم کیا جانا چاہیے۔ انہوں نے سوال اٹھایا کہ جب بھی اسکولوں کو بہتر بنانے کی بات ہوتی ہے تو بی جے پی کے لوگ اس کی مخالفت کیوں کرنے لگتے ہیں۔ کیا بی جے پی کو نہیں لگتا کہ تعلیم اہم ہے اور ملک کے مستقبل کے لیے اچھے اسکول ضروری ہیں؟

ہم کسی پارٹی کی بی ٹیم نہیں، طلبہ کی اے ٹیم ہیں

ابھیجیت دپکے پر عام آدمی پارٹی کی ’بی ٹیم‘ ہونے اور اروند کیجریوال سے فنڈنگ حاصل کرنے کے الزامات پر انہوں نے کہا کہ مختلف لوگ انہیں مختلف سیاسی جماعتوں کی ’بی ٹیم‘ قرار دیتے ہیں۔ انہوں نے کہا کہ مہاراشٹر کے وزیر اعلیٰ انہیں کانگریس کی ’بی ٹیم‘ بتاتے ہیں، جبکہ کچھ لوگ ان پر اروند کیجریوال کی ’بی ٹیم‘ ہونے کا الزام لگاتے ہیں۔ ابھیجیت نے طنزیہ انداز میں کہا کہ سب لوگ ایک ساتھ بیٹھ کر یہ طے کرلیں کہ آخر وہ کس کی ’بی ٹیم‘ ہیں۔ انہوں نے کہا، ’’ہم کسی پارٹی کی ’بی ٹیم‘ نہیں ہیں، ہمارے حساب سے ہم اسٹوڈنٹس کی ’اے ٹیم‘ ہیں۔‘‘

عوامی زندگی میں موجود افراد کی ڈگری پر سوال

ابھیجیت دپکے کی تعلیمی قابلیت اور ڈگری کو لے کر اٹھنے والے سوالات پر بھی انہوں نے ردعمل ظاہر کیا۔ انہوں نے کہا کہ جو لوگ عوامی زندگی میں ہیں، ان کی ڈگری اور تعلیم کے بارے میں سوال پوچھے جا سکتے ہیں۔ خاص طور پر انتخابات لڑنے والے افراد اور آئینی عہدوں پر فائز لوگوں سے ان کی تعلیمی قابلیت کے بارے میں سوال ہونا چاہیے۔ ملک کے کئی ارکان پارلیمنٹ کی جانب سے سورن سماج کے لیے کمیشن بنانے کے مطالبے پر ابھیجیت دپکے نے کہا کہ یہ مطالبہ کرنے والوں کو اپنی بات رکھنے کا حق حاصل ہے۔