’ایمرجنگ ایتھلیٹس‘سے27اگست کوبات کریں گے پی ایم مودی،2036 اولمپکس کے لیے تیار ہوگا روڈمیپ

نئی دہلی: وزیر اعظم نریندر مودی 27 اگست 2026 کو قومی کھیل دن کے موقع پر منعقد ہونے والے ملک گیر پروگرام ’کھیلو انڈیا سنواد، کھیل کی بات، پی ایم کے ساتھ‘ کے تحت ملک کے نوجوانوں اور ایتھلیٹس سے ورچوئل گفتگو کریں گے۔ اس پروگرام کا مقصد ملک کے کھیلوں کے نظام کو مزید مضبوط بنانا، 2036 اولمپکس کے لیے کھیلوں کی صلاحیتوں کا روڈمیپ تیار کرنا اور کھیلوں سے متعلق پالیسی سازی میں نوجوانوں کی شمولیت بڑھانا ہے۔ مرکزی وزیر محنت و روزگار ڈاکٹر منسکھ مانڈویہ نے میڈیا سے گفتگو کرتے ہوئے بتایا کہ اس پروگرام سے تقریباً 1500 مقامات پر طلبہ اور نوجوانوں کو جوڑا جائے گا۔ اس میں آئی آئی ٹی، آئی آئی ایم اور مختلف یونیورسٹیوں کے طلبہ بھی شامل ہوں گے۔ انہوں نے کہا کہ پروگرام کا بنیادی مقصد ابھرتے ہوئے نوجوانوں سے وزیر اعظم کی براہ راست بات چیت کرانا ہے، ساتھ ہی 2036 اولمپکس کے لیے باصلاحیت کھلاڑیوں کی شناخت اور ان کی تیاری کے سلسلے میں ایک جامع روڈمیپ تیار کرنا بھی ہے۔

کھیلوں کی کامیابیوں کی پیشکش بھی کی جائے گی

پروگرام کے دوران وزیر اعظم نریندر مودی کے سامنے ایک پریزنٹیشن پیش کی جائے گی، جس میں مودی حکومت کے گزشتہ 12 برسوں کے دوران کھیلوں کے شعبے میں حاصل کی گئی اہم کامیابیوں کو اجاگر کیا جائے گا۔ ملک کے کئی معروف ایتھلیٹس بھی نوجوانوں سے خطاب کریں گے اور اپنے سفر، جدوجہد اور کامیابیوں کے تجربات شیئر کریں گے۔ مختلف معروف ایتھلیٹس اپنے اپنے اضلاع سے اس پروگرام میں شامل ہوں گے۔ ڈاکٹر منسکھ مانڈویہ نے کہا کہ چیمپئن بننے کی شروعات صرف بڑے اسٹیڈیم سے نہیں بلکہ چھوٹے گاؤں سے بھی ہوسکتی ہے، اور پروگرام کے ذریعے نوجوانوں کو یہی پیغام دیا جائے گا۔ وزیر کھیل منسکھ مانڈویہ خود آئی آئی ٹی دہلی جائیں گے۔ ان کے مطابق یہ ملک میں کھیلوں میں دلچسپی رکھنے والے نوجوانوں اور پالیسی سازوں کے درمیان براہ راست بات چیت قائم کرنے کی ایک بڑی کوشش ہے۔

نوجوانوں سے لیے جائیں گے تجاویز اور نئے آئیڈیاز

پروگرام میں نوجوانوں سے کھیل اور نوجوانوں کی ترقی سے متعلق چار اہم موضوعات پر ان کے خیالات، تجاویز اور نئے آئیڈیاز لیے جائیں گے۔ ان میں کھیلوں کے نظام کو مضبوط بنانا، نچلی سطح تک بہتر کھیل سہولیات پہنچانا، کھلاڑیوں کو مناسب تربیت اور مواقع فراہم کرنا شامل ہے۔ نوجوانوں کی جانب سے موصول ہونے والی تجاویز کو براہ راست پالیسی سازوں اور کھیلوں سے متعلق اداروں تک پہنچایا جائے گا، تاکہ زمینی سطح پر نوجوانوں کے تجربات، ضروریات اور خواہشات کو پالیسی سازی کا حصہ بنایا جاسکے۔

پالیسی سازوں اور نوجوانوں کے درمیان براہ راست رابطہ

’کھیلو انڈیا سنواد‘ کھیلوں سے محبت رکھنے والے نوجوانوں اور ملک کے پالیسی سازوں کے درمیان براہ راست رابطے کا ایک اہم ذریعہ بننے جا رہا ہے۔ اس کے ذریعے نوجوان اپنے خیالات، تجربات اور تجاویز براہ راست پیش کرسکیں گے۔ پروگرام کا وسیع مقصد کھیلوں کے نظام کو مضبوط بنانا، 2036 اولمپکس کے لیے باصلاحیت کھلاڑیوں کا روڈمیپ تیار کرنا اور ملک کی حکمرانی میں نوجوانوں کی شمولیت کو مزید بڑھانا ہے۔