لال قلعہ پر پہلی بار مکمل ’وندے ماترم‘ کی گونج، مرکزی وزیر داخلہ امت شاہ نے اس لمحے کو تاریخی قرار دیا

ئی دہلی: ملک کے 80ویں یومِ آزادی کے موقع پر ہفتہ کو لال قلعہ پر ایک تاریخی منظر دیکھنے کو ملا۔ وزیر اعظم نریندر مودی نے لال قلعہ کی فصیل پر ترنگا لہرایا، جس کے بعد پہلی بار یہاں قومی نغمہ ’وندے ماترم‘ کا مکمل ورژن پیش کیا گیا۔ اس کے بعد قومی ترانہ ’جن گن من‘ بجایا گیا۔ مرکزی وزیر داخلہ امت شاہ نے اس موقع کو تاریخی قرار دیتے ہوئے کہا کہ ’وندے ماترم‘ آزادی کی تحریک کا ایک پرجوش نعرہ رہا ہے۔ انہوں نے کہا کہ آزادی کے 80 سال بعد لال قلعہ کی فصیل سے اس کا مکمل ورژن سننا انتہائی جذباتی لمحہ ہے۔ اس سال ’وندے ماترم‘ کی تخلیق کے 150 سال بھی مکمل ہو رہے ہیں۔

پہلی بار پیش کیا گیا لال قلعہ پر’وندے ماترم‘ کا مکمل ورژن

امت شاہ نے سوشل میڈیا پر اپنی پوسٹ میں لکھا کہ ’وندے ماترم‘ آزادی کی تحریک کا ایک پرجوش نعرہ رہا ہے۔ انہوں نے کہا کہ آزادی کے 80 سال بعد پہلی مرتبہ لال قلعہ کی فصیل سے اس کے مکمل ورژن کی پیشکش ہوئی۔ امت شاہ کے مطابق، اس تاریخی لمحے کا گواہ بن کر نہ صرف رونگٹے کھڑے ہوگئے بلکہ جسم و جان مسرور ہوگئے۔ 80ویں یومِ آزادی کی تقریب میں وزیر اعظم نریندر مودی کی قیادت میں لال قلعہ کی فصیل پر پہلی بار قومی نغمہ ’وندے ماترم‘ کا مکمل ورژن پیش کیا گیا۔ قومی نغمے کے بعد قومی ترانہ ’جن گن من‘ بجایا گیا۔ اس سال ’وندے ماترم‘ کی تخلیق کے 150 سال مکمل ہونے کے باعث یومِ آزادی کی تقریب میں اسے خصوصی اہمیت دی گئی۔ وزیر اعظم مودی نے قوم سے خطاب کے دوران بھی اس تاریخی موقع کا ذکر کیا اور کہا کہ آزادی کے بعد یہ پہلی مرتبہ ہے جب لال قلعہ پر مکمل ’وندے ماترم‘ پیش کیا گیا۔

ترنگا لہراتے ہی 21 توپوں کی سلامی

وزیر اعظم نریندر مودی کے لال قلعہ کی فصیل پر قومی پرچم لہراتے ہی 1721 فیلڈ بیٹری (سیریمنیئل) نے دیسی 105 ایم ایم لائٹ فیلڈ گن سے 21 توپوں کی سلامی دی۔ اس کے بعد فوجی بینڈ نے ’وندے ماترم‘ کی دھن پیش کی۔ اسی دوران بھارتی فضائیہ کے دو ایم آئی-17 ہیلی کاپٹروں نے لال قلعہ کے اوپر سے پھولوں کی بارش کی۔ ایک ہیلی کاپٹر پر ترنگا جبکہ دوسرے پر ’وندے ماترم‘ تحریر والا پرچم لہرا رہا تھا۔ آسمان سے پھولوں کی بارش اور لال قلعہ سے گونجتے قومی نغمے نے یومِ آزادی کی تقریب کو مزید شاندار اور یادگار بنا دیا۔

’وندے ماترم‘ کو قومی ترانے جیسا قانونی تحفظ

رپورٹ کے مطابق حال ہی میں ’وندے ماترم‘ کے مکمل ورژن کو قومی ترانے کے مساوی قانونی تحفظ فراہم کیے جانے کی بات سامنے آئی ہے۔ 80ویں یومِ آزادی کے موقع پر صدر جمہوریہ دروپدی مرمو کے قوم سے خطاب کی ابتدا اور اختتام پر بھی ’وندے ماترم‘ بجایا گیا تھا۔ یہ تبدیلی صدر جمہوریہ کی جانب سے قومی اعزاز کی توہین کی روک تھام (ترمیمی) بل، 2026 کو منظوری دیے جانے کے بعد سامنے آئی ہے۔ نئے ضوابط کے مطابق ’وندے ماترم‘ کی پیشکش میں جان بوجھ کر رکاوٹ ڈالنے یا اسے روکنے پر جرمانہ، تین سال تک قید یا دونوں سزائیں دی جا سکتی ہیں۔ اس طرح 80ویں یومِ آزادی پر لال قلعہ کی فصیل سے مکمل ’وندے ماترم‘ کی پیشکش، 21 توپوں کی سلامی اور بھارتی فضائیہ کے ہیلی کاپٹروں سے پھولوں کی بارش نے قومی تقریب کو تاریخی اور شاندار بنا دیا۔