نیپال نے سرحد پار سفر کیلئے قومی شناختی کارڈ کو تسلیم کرنے کی بھارت سے کی اپیل، سکیورٹی اور شناختی نظام کو مزید مضبوط بنانے پر زور

کھٹمنڈو: نیپال نے باضابطہ طور پر حکومت ہند سے اپیل کی ہے کہ وہ نیپالی شہریوں کے قومی شناختی کارڈ (نیشنل آئیڈینٹیٹی کارڈ – NID) کو سرحد پار سفر کے لیے ایک درست سفری دستاویز کے طور پر تسلیم کرے۔ اس اقدام کا مقصد دونوں ممالک کے درمیان آمد و رفت کو مزید آسان بنانا، شناخت کی تصدیق کے نظام کو مضبوط کرنا اور سرحدی سلامتی کو بہتر بنانا ہے۔ نیپال کا نیشنل آئیڈینٹیٹی کارڈ بھارت کے آدھار کارڈ کی طرز پر تیار کیا گیا ہے، جس میں فنگر پرنٹس، چہرے کی شناخت اور آنکھوں کے اسکین سمیت بایومیٹرک معلومات محفوظ ہوتی ہیں۔ نیپالی حکومت نے پاسپورٹ کے اجرا، اراضی کی رجسٹریشن، بینک اکاؤنٹ کھلوانے اور متعدد سرکاری خدمات کے لیے اس کارڈ کو لازمی قرار دیا ہے۔

شہریت کے کاغذی سرٹیفکیٹ کی جگہ ڈیجیٹل شناخت

نیپال کی موجودہ حکومت مرحلہ وار روایتی شہریت کے سرٹیفکیٹ کی جگہ ڈیجیٹل طور پر قابلِ تصدیق قومی شناختی کارڈ متعارف کرانا چاہتی ہے۔ اسی پالیسی کے تحت بھارت سے بھی درخواست کی گئی ہے کہ وہ نیپالی شہریوں کے لیے اس کارڈ کو سرحدی اور فضائی سفر میں قابل قبول شناختی دستاویز تسلیم کرے۔ نیپال کے محکمۂ امیگریشن کے ڈائریکٹر جنرل رام چندر تیواری نے بتایا کہ جون کے آخر میں حکومتِ ہند کو باضابطہ تجویز بھیجی گئی تھی۔ ان کے مطابق فی الحال بھارت نیپال کے پاسپورٹ اور شہریت کے سرٹیفکیٹ کو ہی سرکاری شناختی دستاویز کے طور پر تسلیم کرتا ہے، تاہم نیپال چاہتا ہے کہ قومی شناختی کارڈ کو بھی اسی فہرست میں شامل کیا جائے۔ تیواری نے بتایا کہ نیپال میں بھارتی سفارت خانے کے حکام نے حال ہی میں قومی شناختی کارڈ کی تکنیکی خصوصیات اور حفاظتی نظام سے متعلق معلومات حاصل کی ہیں۔ ان کے مطابق یہ کوئی باضابطہ دوطرفہ اجلاس نہیں تھا بلکہ معلومات کے تبادلے کا عمل تھا۔

سرحدی سلامتی میں بہتری کی توقع

رام چندر تیواری نے کہا کہ روایتی شہریت کے سرٹیفکیٹ میں بایومیٹرک معلومات موجود نہیں ہوتیں، جبکہ نیشنل آئیڈینٹیٹی کارڈ جدید اور محفوظ شناختی نظام فراہم کرتا ہے۔ ان کے مطابق اس کارڈ کو تسلیم کیے جانے سے نہ صرف شناخت کی تصدیق زیادہ مؤثر ہوگی بلکہ نیپال اور بھارت دونوں کی سرحدی سلامتی بھی مزید مضبوط ہوگی۔ واضح رہے کہ بھارت اور نیپال کے درمیان کھلی سرحد موجود ہے، جہاں دونوں ممالک کے شہری بغیر پاسپورٹ یا ویزا کے بیشتر زمینی راستوں سے آمد و رفت کر سکتے ہیں۔ فضائی سفر کے لیے اس وقت بھارتی شہری پاسپورٹ، ووٹر شناختی کارڈ یا مرکزی و ریاستی حکومتوں کی جانب سے جاری کردہ شناختی دستاویز استعمال کر سکتے ہیں۔ نیپال کے قومی شناختی و سول رجسٹریشن محکمہ کے مطابق اب تک 45 لاکھ سے زائد نیپالی شہریوں کو نیشنل آئیڈینٹیٹی کارڈ جاری کیا جا چکا ہے، جبکہ تقریباً دو کروڑ افراد اس کے لیے اندراج کرا چکے ہیں۔