اے ای ایس ایل نے آندھرا پردیش میں 8,500 کروڑ روپے کا گرین انرجی ٹرانسمیشن پروجیکٹ حاصل کر لیا

نئی دہلی :اڈانی انرجی سلوشنز لمیٹڈ (AESL) نے آندھرا پردیش میں بین الریاستی بجلی ترسیل کا 8,500 کروڑ روپے مالیت کا بڑا منصوبہ حاصل کر لیا ہے۔ یہ پروجیکٹ ٹیرف بیسڈ کمپٹیٹو بڈنگ (TBCB) کے تحت کمپنی کو تفویض کیا گیا ہے۔ 24 جولائی 2026 کو اعلان کیے گئے اس منصوبے کا مقصد وشاکھاپٹنم (ویزاگ) خطے میں مجوزہ گرین ہائیڈروجن، گرین امونیا اور ابھرتے ہوئے ڈیٹا سینٹرز کی تقریباً 4,500 میگاواٹ بجلی کی ضرورت کو پورا کرنا ہے۔اس کامیابی کے ساتھ اے ای ایس ایل کا مجموعی ٹرانسمیشن آرڈر بک 80 ہزار کروڑ روپے سے تجاوز کر گیا ہے، جس سے بھارت کی سب سے بڑی نجی بجلی ترسیلی کمپنی کے طور پر اس کی پوزیشن مزید مضبوط ہوئی ہے۔

یہ منصوبہ ’’آندھرا پردیش کے ویزاگ علاقے میں مجوزہ گرین ہائیڈروجن اور گرین امونیا منصوبوں کے لیے ٹرانسمیشن سسٹم (فیز-1)‘‘ کے نام سے مکمل کیا جائے گا۔ اس پر عمل درآمد کمپنی کے خصوصی مقصد کے ادارے (SPV) ’’ویزاگ پاور ٹرانسمیشن لمیٹڈ‘‘ کے ذریعے کیا جائے گا۔منصوبے کے تحت پندرُتھی (ویزاگ) میں 4×1500 ایم وی اے، 765/400 کے وی جی آئی ایس سب اسٹیشن اور کھمم-2 میں 3×1500 ایم وی اے، 765/400 کے وی سب اسٹیشن قائم کیے جائیں گے۔ اس کے علاوہ 1,582 سرکٹ کلومیٹر نئی ٹرانسمیشن لائنیں بچھائی جائیں گی اور 10,500 ایم وی اے کی اضافی ٹرانسفارمیشن صلاحیت بھی شامل کی جائے گی۔اس منصوبے کے بعد اے ای ایس ایل کا مجموعی ٹرانسمیشن نیٹ ورک بڑھ کر 29,531 سرکٹ کلومیٹر تک پہنچ جائے گا، جبکہ کمپنی کی مجموعی ٹرانسفارمیشن صلاحیت 1,33,675 ایم وی اے ہو جائے گی۔

اڈانی انرجی سلوشنز کے چیف ایگزیکٹو آفیسر کندرپ پٹیل نے کہا کہ یہ منصوبہ بھارت کی آئندہ صنعتی ترقی کے لیے توانائی کے بنیادی ڈھانچے کو مضبوط کرے گا۔ ان کے مطابق اس سے نہ صرف گرین ہائیڈروجن اور گرین امونیا جیسے صاف توانائی کے منصوبوں کو فروغ ملے گا بلکہ مصنوعی ذہانت (AI)، ہائپر اسکیل ڈیٹا سینٹرز اور زیرِ سمندر کنیکٹیویٹی جیسے جدید ڈیجیٹل انفراسٹرکچر کو بھی مستحکم بجلی کی فراہمی یقینی بنائی جا سکے گی۔

کمپنی کے مطابق 8,500 کروڑ روپے کا یہ معاہدہ اس کے 80 ہزار کروڑ روپے سے زائد کے آرڈر بک میں اہم اضافہ ہے۔ یہ منصوبہ بھارت کے توانائی کے شعبے میں سبز منتقلی (Energy Transition) کے قومی اہداف کے مطابق ہے، جبکہ ڈیٹا سینٹرز کو بجلی کی فراہمی اس بات کی نشاندہی کرتی ہے کہ مستقبل میں صنعتی ڈی کاربنائزیشن اور ڈیجیٹل انفراسٹرکچر دونوں بجلی کی طلب کے بڑے محرک ہوں گے۔اس منصوبے کو تقریباً 30 ماہ میں مکمل کرنے کا ہدف مقرر کیا گیا ہے تاکہ متوقع 4,500 میگاواٹ بجلی کی طلب کو بروقت پورا کیا جا سکے۔قابل ذکر ہے کہ اڈانی انرجی سلوشنز صرف بجلی کی ترسیل تک محدود نہیں بلکہ بجلی کی تقسیم، اسمارٹ میٹرنگ اور کولنگ سلوشنز کے شعبوں میں بھی سرگرم ہے اور اس وقت ممبئی اور منڈرا اسپیشل اکنامک زون سمیت تقریباً 1.3 کروڑ صارفین کو خدمات فراہم کر رہی ہے۔