’’مشرقی بھارت کی ترقی ہی بھارت کی اصل ترقی ہے‘‘ اوڈیشہ حکومت کے دو سال مکمل ہونے پر میوربھنج میں تقریب سے وزیراعظم کا خطاب

میوربھنج: وزیراعظم نریندر مودی نے ہفتہ کے روز اوڈیشہ حکومت کے دو سال مکمل ہونے کے موقع پر ریاست کے مایوربھنج میں منعقدہ ایک تقریب سے خطاب کرتے ہوئے کہا کہ مرکزی حکومت کا وژن ہے کہ مشرقی بھارت کی ترقی ہی بھارت کی ترقی ہے۔ وزیراعظم مودی نے اپنے خطاب میں کہا کہ مرکزی حکومت ’پورودے‘ (Purvodaya) پالیسی کے تحت مشرقی بھارت کی ترقی کے لیے کام کر رہی ہے۔ انہوں نے کہا: ’’مرکزی حکومت کا وژن ہے کہ مشرقی بھارت کی ترقی سے ہی بھارت کی ترقی ہوگی۔ اسی لیے ہم پورودے کی پالیسی پر عمل کر رہے ہیں۔ کانگریس کے دور میں جس مشرقی بھارت کو پسماندگی کی علامت بنا دیا گیا تھا، آج وہ ترقی کے دروازے میں تبدیل ہو رہا ہے۔ اوڈیشہ خود اس تبدیلی کا گواہ بن رہا ہے۔‘‘

اوڈیشہ کی ڈبل انجن حکومت کو مبارکباد

وزیر اعظم نے کہا کہ اوڈیشہ میں بی جے پی حکومت نے اپنے دو سال مکمل کر لیے ہیں اور اس موقع پر میوربھنج آکر عوام سے ملاقات ان کے لیے خوشی کا باعث ہے۔ انہوں نے کہا: ’’اوڈیشہ کے عوام کو ڈبل انجن حکومت کی ترقیاتی مہم پر مبارکباد پیش کرتا ہوں۔ آپ لوگوں کی محبت مجھے بار بار یہاں کھینچ لاتی ہے۔‘‘ اپنے خطاب میں وزیراعظم نے پنڈت رگھوناتھ مرمو کو یاد کرتے ہوئے کہا کہ انہوں نے سنتھالی زبان کے لیے ’اول چکی‘ (Ol Chiki) رسم الخط تیار کیا تھا۔ انہوں نے کہا کہ موجودہ حکومت نے سنتھالی زبان میں بھارت کا آئین شائع کیا ہے اور اوڈیشہ کی متعدد ممتاز شخصیات کو پدم اعزازات سے نوازا ہے۔ وزیر اعظم نے کہا کہ گزشتہ دو برسوں میں اوڈیشہ حکومت بھی ریاست کی عظیم شخصیات کے خوابوں کو پورا کرنے کے لیے مسلسل کام کر رہی ہے۔

صدر دروپدی مرمو کو سالگرہ کی مبارکباد

وزیراعظم مودی نے اس موقع پر صدر دروپدی مرمو کو ان کی سالگرہ پر مبارکباد بھی پیش کی۔ انہوں نے کہا: ’’آج کا دن اس لیے بھی خاص ہے کہ میوربھنج کی سرزمین پر پروان چڑھنے والی ہماری معزز صدر ہمارے درمیان موجود ہیں۔ آج ان کی سالگرہ بھی ہے۔ میں انہیں دلی مبارکباد پیش کرتا ہوں اور ان کی طویل عمر اور بہترین صحت کی دعا کرتا ہوں۔‘‘ انہوں نے کہا کہ اوڈیشہ کی بیٹی آج ملک کے اعلیٰ ترین آئینی منصب پر فائز ہو کر پورے ملک کی رہنمائی کر رہی ہیں، جو ہم سب کے لیے باعثِ فخر ہے۔

47 ہزار کروڑ روپے سے زائد کے منصوبے

وزیر اعظم نے کہا کہ اس موقع پر اوڈیشہ کی ترقی سے متعلق کئی اہم منصوبوں کا افتتاح اور سنگِ بنیاد رکھا گیا ہے، جن پر تقریباً 47 ہزار کروڑ روپے خرچ کیے جائیں گے۔ انہوں نے بتایا کہ بجلی، سڑک، صحت، ریلوے اور تعلیم سے متعلق ان منصوبوں سے ریاست کے عوام کو وسیع پیمانے پر سہولتیں حاصل ہوں گی۔ وزیر اعظم مودی نے اعلان کیا کہ پہاڑپور گاؤں کو تیزی سے ’سولر ولیج‘ کے طور پر ترقی دی جائے گی۔ انہوں نے کہا: ’’اس کا مطلب ہے کہ گاؤں کے ہر گھر تک شمسی توانائی کی سہولت پہنچائی جائے گی۔ جس طرح کونارک کا سورج مندر اوڈیشہ کی شناخت ہے، اسی طرح پہاڑپور بھی سولر ولیج کے طور پر اپنی منفرد شناخت قائم کرے گا۔ اس سے دیہاتیوں کو مفت بجلی ملے گی، جبکہ اضافی بجلی فروخت کرکے وہ آمدنی بھی حاصل کر سکیں گے۔‘‘

2036 اور 2047 کے اہداف پر زور

وزیر اعظم نے کہا کہ آنے والے برسوں میں دو اہم سنگِ میل سامنے ہیں۔ 2036 میں اوڈیشہ کے قیام کے 100 سال مکمل ہوں گے، جبکہ 2047 میں بھارت کی آزادی کے 100 سال پورے ہوں گے۔ انہوں نے کہا: ’’اوڈیشہ اور ملک دونوں کا ہدف ایک ہی سمت میں ہے۔ اگر اوڈیشہ کی معیشت مضبوط ہوگی تو بھارت بھی مضبوط ہوگا۔ مجھے اوڈیشہ کی صلاحیتوں پر پورا یقین ہے۔ ہمیں مل کر اوڈیشہ کو ترقی کی نئی بلندیوں تک پہنچانا ہے۔‘‘