یوپی میں اسدالدین اویسی کی للکارپر بی جے پی نے کیا پلٹ وار، ڈومریا گنج کے رکن پارلیمنٹ جگدمبیکا پال نے الیکشن کے نتائج سے متعلق کہی یہ بڑی بات

نئی دہلی: اترپردیش میں ضلع سدھارتھ نگرکے ڈومریا گنج لوک سبھا حلقہ سے بی جے پی کے رکن پارلیمنٹ جگدمبیکا پال نے آل انڈیا مجلس اتحاد المسلمین (اے آئی ایم آئی ایم) کے لیڈر اور حیدرآباد کے رکن پارلیمنٹ اسدالدین اویسی کی للکارپرسخت پلٹ وارکیا ہے۔ بی جے پی ایم پی جگدمبیکا پال نے اے آئی ایم آئی ایم سربراہ اسدالدین اویسی کے بیان پربھی سخت ردعمل کا اظہار کیا ہے۔

جگدمبیکا پال نے کہا، ”انہوں نے مہاراجہ سہیل دیوسے منسلک سرزمین پرایک حملہ آورکی تعریف کرکے اپنی مہم شروع کی ہے۔ یہ خوشنودی کی سیاست اورہندووں اورمسلمانوں کے درمیان تقسیم اورنفرت پیدا کرنے کی کوشش ہے۔ لوگ اب ایسی چالوں کوسمجھ گئے ہیں۔ انتخابی نتائج نے یہ بارباردکھایا ہے اورعوام ایسی کوششوں کوکامیاب نہیں ہونے دے گی۔”

آپ کوبتا دیں کہ اسدالدین اویسی نے اتوارکے روزبہرائچ کے مٹیرا اسمبلی حلقہ میں منعقدہ ایک عوامی جلسے میں کہا، ”اگرکوئی بی جے پی کوروکنا چاہتا ہے تومجلس اتحاد المسلمین احترام اور حصہ داری کے ساتھ بات چیت کے لئے تیارہے، لیکن اب دری بچھانے کی سیاست نہیں ہوگی۔ حصہ داری اوربرابری کی لڑائی ہوگی۔” اویسی نے سماجوادی پارٹی کے سربراہ اکھلیش یادوپر بھی تنقید کرتے ہوئے کہا، ”آپ بنگال میں جس کی حمایت کرنے گئے تھے، کل جوکہتے تھے کہ دل میں مدینہ آنکھ میں کعبہ، وہ اب بابا کے ساتھ بیٹھ کرچائے پی رہے ہیں اورگالی آپ اویسی کو دے رہے ہیں۔”