وزیر اعظم مودی کے 12 سال مکمل، یوپی اور بہار کے وزراء نے دی مبارکباد، ترقی اور عالمی وقار کو سراہا

نئی دہلی: وزیر اعظم نریندر مودی کے بطور وزیر اعظم 12 سال مکمل ہونے کے موقع پر اتر پردیش اور بہار کے متعدد وزراء نے انہیں مبارکباد پیش کرتے ہوئے ان کے دورِ حکومت کو ترقی، عوامی فلاح، بہتر حکمرانی اور قومی تعمیر کا دور قرار دیا ہے۔ وزراء نے مختلف سرکاری منصوبوں، اقتصادی پیش رفت اور عالمی سطح پر بھارت کے بڑھتے ہوئے اثر و رسوخ کو ان برسوں کی اہم کامیابیوں میں شمار کیا۔

کیشو پرساد موریہ نے عوامی فلاحی اسکیموں کا ذکر کیا

اتر پردیش کے نائب وزیر اعلیٰ کیشو پرساد موریہ نے سوشل میڈیا پلیٹ فارم ایکس پر اپنے پیغام میں کہا کہ وزیر اعظم مودی کی قیادت میں گزشتہ 12 برس اعتماد، ترقی اور عوامی فلاح کے تاریخی سال ثابت ہوئے ہیں۔ انہوں نے کہا کہ حکومت نے ترقی کو صرف اقتصادی اشاریوں تک محدود نہیں رکھا بلکہ سماج کے آخری فرد تک اس کے فوائد پہنچانے کی کوشش کی۔موریہ نے جن دھن یوجنا، آیوشمان بھارت، پردھان منتری آواس یوجنا، ہر گھر جل، اجولا یوجنا، سوچھ بھارت مشن اور مفت راشن جیسی اسکیموں کا حوالہ دیتے ہوئے کہا کہ ان اقدامات سے کروڑوں غریب اور ضرورت مند خاندانوں کی زندگی میں مثبت تبدیلی آئی ہے اور ان میں عزتِ نفس اور خود اعتمادی پیدا ہوئی ہے۔

نند گوپال نندی نے عالمی سطح پر بھارت کی مضبوط پوزیشن کو سراہا

اتر پردیش حکومت کے وزیر نند گوپال نندی نے کہا کہ ’’راشٹر فرسٹ‘‘ کے عزم کے ساتھ مودی حکومت کے 12 سال ملک کی ہمہ جہت ترقی، بہتر حکمرانی اور عوامی بہبود کی ایک تاریخی داستان ہیں۔ ان کے مطابق حکومت کی پالیسیاں غریبوں، نوجوانوں، کسانوں اور خواتین کو بااختیار بنانے پر مرکوز رہی ہیں۔انہوں نے کہا کہ ان برسوں کے دوران بھارت نے اقتصادی ترقی، ڈیجیٹل اختراعات، بنیادی ڈھانچے کی توسیع، سماجی تحفظ، ثقافتی احیاء اور خود کفالت کے میدان میں نمایاں کامیابیاں حاصل کیں۔ نندی کے مطابق عالمی سطح پر بھی بھارت کا وقار، اثر و رسوخ اور قیادی کردار غیر معمولی طور پر مضبوط ہوا ہے۔

کنور برجیش سنگھ نے نوجوانوں کے کردار کو اجاگر کیا

اتر پردیش کے وزیر کنور برجیش سنگھ نے اپنے پیغام میں کہا کہ وزیر اعظم مودی کی دور اندیش قیادت میں بھارت کی نوجوان نسل نے خود اعتمادی، اختراع اور خود کفالت کے نئے معیار قائم کیے ہیں۔ انہوں نے کہا کہ اس عرصے میں اسکل انڈیا، اسٹارٹ اپ انڈیا، ڈیجیٹل انڈیا، پردھان منتری کوشل وکاس یوجنا اور قومی تعلیمی پالیسی جیسی اسکیموں نے نوجوانوں کو نئے مواقع فراہم کیے ہیں۔انہوں نے مزید کہا کہ آج کا بھارتی نوجوان صرف ملازمت تلاش کرنے والا نہیں بلکہ روزگار پیدا کرنے والا، اختراع کا علمبردار اور ملک کی ترقی کا فعال شریک بن چکا ہے۔

وجے کمار سنہا نے اسے خدمت اور بہتر حکمرانی کا دور قرار دیا

بہار حکومت کے وزیر وجے کمار سنہا نے وزیر اعظم مودی کے 12 سالہ دور کو ’’خدمت، سوشاسن اور غریب فلاح کے 12 سنہری سال‘‘ قرار دیا۔ انہوں نے کہا کہ اس عرصے میں بھارت نے عوامی فلاح، بنیادی ڈھانچے، ڈیجیٹل انقلاب، سماجی تحفظ، ثقافتی بیداری اور عالمی قیادت کے میدان میں نئی مثالیں قائم کی ہیں۔سنہا نے پردھان منتری آواس یوجنا، اجولا یوجنا، سوچھ بھارت مشن، ڈیجیٹل انڈیا، یو پی آئی اور ڈجی لاکر جیسی اسکیموں کا ذکر کرتے ہوئے کہا کہ ان اقدامات نے عوام کی زندگی کو آسان بنانے اور معیشت کو مضبوط کرنے میں اہم کردار ادا کیا ہے۔انہوں نے کہا کہ ’’سب کا ساتھ، سب کا وکاس، سب کا وشواس اور سب کا پریاس‘‘ کے نظریے نے ترقی کے فوائد کو ملک کے ہر طبقے تک پہنچانے میں مدد دی ہے۔ ان کے مطابق آج بھارت صرف ترقی کی راہ پر گامزن ملک نہیں بلکہ عالمی سطح پر قائدانہ کردار ادا کرنے والی ایک بااعتماد اور مضبوط قوم کے طور پر ابھر رہا ہے۔وزراء نے اپنے پیغامات میں اس امید کا اظہار بھی کیا کہ وزیر اعظم مودی کی قیادت میں بھارت 2047 تک ’’وکست بھارت‘‘ یعنی ترقی یافتہ بھارت کے ہدف کو حاصل کرنے کی سمت مزید تیزی سے آگے بڑھے گا۔