ممتا بنرجی نے الیکشن کمیشن کو لکھا خط، بی جے پی پر ’ووٹر ہائی جیکنگ‘ کی کوشش کا الزام

کولکاتا: مغربی بنگال کی وزیراعلیٰ اور ترنمول کانگریس کی سربراہ ممتا بنرجی نے چیف الیکشن کمشنر کو خط لکھ کر الزام عائد کیا ہے کہ 2026 اسمبلی انتخابات سے قبل ریاست میں جمہوری حقوق کو نقصان پہنچانے کی سازش کی جا رہی ہے۔ انہوں نے کہا کہ بی جے پی کے ایجنٹوں کو رنگے ہاتھوں پکڑا گیا ہے جو مغربی بنگال کے چیف الیکٹورل آفیسر کے دفتر میں بڑی تعداد میں جعلی فارم 6 جمع کرا رہے ہیں تاکہ غیر مقامی افراد کو ووٹر فہرست میں شامل کیا جا سکے۔ ممتا بنرجی کے مطابق یہ ’’ووٹر ہائی جیکنگ‘‘ کی کوشش ہے، جیسا کہ بی جے پی نے مہاراشٹر اور دہلی میں کیا تھا۔

جعلی درخواستوں اور تاخیر پر سوال

ممتا بنرجی نے الزام لگایا کہ جہاں ایک طرف 60 لاکھ سے زائد حقیقی ووٹرز کی درخواستیں زیر التوا ہیں اور غلط عمل کے باعث 200 سے زائد افراد جان گنوا چکے ہیں، وہیں الیکشن کمیشن مشتبہ طور پر بڑی تعداد میں جعلی درخواستوں کو تیزی سے نمٹا رہا ہے۔ انہوں نے کہا کہ یہ عمل نہ صرف غیر قانونی ہے بلکہ سپریم کورٹ کے احکامات کے بھی خلاف ہے اور مغربی بنگال میں آزاد و منصفانہ انتخابات پر براہِ راست حملہ ہے۔

الیکشن کمیشن سے فوری کارروائی کا مطالبہ

وزیراعلیٰ نے الیکشن کمیشن آف انڈیا سے مطالبہ کیا کہ اس ’’غیر جمہوری عمل‘‘ کو فوری طور پر روکا جائے اور سپریم کورٹ کی ہدایات پر سختی سے عمل کیا جائے۔ انہوں نے یہ بھی کہا کہ 28 فروری 2026 کو حتمی ووٹر لسٹ جاری ہونے کے بعد کسی بھی جعلی ووٹر کو شامل نہ کیا جائے۔ انہوں نے خبردار کیا کہ بنگال کے عوام اپنی جمہوریت کو ’’دن دہاڑے چوری‘‘ نہیں ہونے دیں گے اور اس معاملے پر گہری نظر رکھے ہوئے ہیں۔

بی جے پی پر مزید الزامات اور انتخابی ماحول

اپنے خط میں ممتا بنرجی نے کہا کہ یہ ایک منظم کوشش معلوم ہوتی ہے جس میں بی جے پی اور الیکشن کمیشن کی ملی بھگت شامل ہو سکتی ہے۔ انہوں نے خدشہ ظاہر کیا کہ جمع کرائے گئے فارم ایسے افراد کے لیے ہو سکتے ہیں جو ریاست کے حقیقی باشندے نہیں ہیں۔ اس سے قبل بھی انہوں نے ایک عوامی جلسے میں بی جے پی پر سخت تنقید کرتے ہوئے الزام لگایا تھا کہ پارٹی فسادات کو ہوا دیتی ہے اور اگر اقتدار میں آئی تو عوام کے طرزِ زندگی پر بھی اثر پڑ سکتا ہے۔ یہ پیش رفت ایسے وقت میں سامنے آئی ہے جب مغربی بنگال میں اسمبلی انتخابات قریب ہیں اور سیاسی ماحول مسلسل کشیدہ ہوتا جا رہا ہے۔