راہل گاندھی نے میرابائی چانو کو گولڈ میڈل جیتنے پر دی مبارکباد ، کہا: “آپ کی کامیابی پورے ملک کے لیے باعث تحریک ہے

نئی دہلی: لوک سبھا میں قائدِ حزبِ اختلاف اور کانگریس کے سینئر رہنما راہل گاندھی نے گلاسگو میں جاری کامن ویلتھ گیمز 2026 میں ویٹ لفٹنگ کے مقابلوں میں طلائی تمغہ جیتنے والی سیکھوم میرابائی چانو کو مبارکباد پیش کی ہے۔راہل گاندھی نے فیس بک پر میرابائی چانو کی کامیابی کی تصویر شیئر کرتے ہوئے لکھا، “کامن ویلتھ گیمز میں ویٹ لفٹنگ کے مقابلوں میں مسلسل تیسرا تاریخی گولڈ میڈل جیتنے پر سیکھوم میرابائی چانو کو دل کی گہرائیوں سے مبارکباد۔ آپ نے اپنی ہمت، نظم و ضبط اور مسلسل محنت کے ذریعے ایک بار پھر عالمی سطح پر ترنگا بلند کیا ہے۔ ہر بھارتی کو آپ کی اس شاندار کامیابی پر فخر ہے۔ آپ کی یہ کامیابی پورے ملک کے لیے ایک عظیم تحریک ہے۔”

کانگریس کے قومی صدر ملکارجن کھڑگے نے بھی میرابائی چانو اور ویٹ لفٹر رشی کانت سنگھ چنمبم کو ان کی کامیابی پر مبارکباد دی۔کھڑگے نے سوشل میڈیا پلیٹ فارم ایکس پر اپنے پیغام میں لکھا، “میرابائی چانو کو مسلسل تیسرے کامن ویلتھ گیمز میں تاریخی طلائی تمغہ جیتنے پر اور رشی کانت سنگھ چنمبم کو بھارت کے لیے پہلا چاندی کا تمغہ جیتنے کے ساتھ نیا کامن ویلتھ گیمز ریکارڈ قائم کرنے پر بہت بہت مبارکباد۔ آپ دونوں کی شاندار کامیابیوں نے پورے ملک کا سر فخر سے بلند کر دیا ہے اور لاکھوں نوجوان بھارتیوں کو نئی تحریک دی ہے۔”اتوار کو گلاسگو میں منعقدہ ویٹ لفٹنگ مقابلوں میں رشی کانت سنگھ چنمبم نے مردوں کے 60 کلوگرام زمرے میں چاندی کا تمغہ حاصل کیا، جبکہ میرابائی چانو نے خواتین کے 48 کلوگرام زمرے میں طلائی تمغہ جیت کر بھارت کو کامن ویلتھ گیمز 2026 کا پہلا گولڈ میڈل دلایا۔

میرابائی چانو نے اس کامیابی کے ساتھ کامن ویلتھ گیمز میں گولڈ میڈل کی ہیٹ ٹرک بھی مکمل کر لی۔ اس سے قبل وہ 2018 کے گولڈ کوسٹ کامن ویلتھ گیمز اور 2022 کے برمنگھم کامن ویلتھ گیمز میں بھی طلائی تمغہ اپنے نام کر چکی ہیں۔ اس کے علاوہ انہوں نے 2014 کے گلاسگو کامن ویلتھ گیمز میں چاندی کا تمغہ جیتا تھا۔میرابائی چانو کا شمار اس وقت بھارت کی کامیاب ترین ایتھلیٹس میں ہوتا ہے۔ انہوں نے ٹوکیو اولمپکس میں بھی چاندی کا تمغہ جیت کر ملک کا نام روشن کیا تھا اور اب کامن ویلتھ گیمز میں مسلسل تیسری بار طلائی تمغہ حاصل کر کے اپنی عظمت کا ایک اور ثبوت پیش کیا ہے۔