میناب حملے میں جاں بحق طلبہ کو ایران کا خراج عقیدت، فیفا عالمی کپ میں ’میناب 168‘ کے نام سے میدان میں اتری ٹیم

ہران: ایران نے فروری 2026 میں میناب کے ایک پرائمری اسکول پر ہونے والے میزائل حملے میں جاں بحق ہونے والے طلبہ کی یاد میں خصوصی خراج عقیدت پیش کیا۔ فیفا ورلڈ کپ 2026 مہم کے دوران ایرانی فٹبال ٹیم ’’میناب 168‘‘ کے نام سے مقابلوں میں حصہ لے رہی ہے اور کھلاڑی اپنی یونیفارم پر سنہری بیجز لگا کر متاثرین کو خراج تحسین پیش کر رہے ہیں۔

ایران کی وزارت خارجہ کا جذباتی پیغام

ایران کی وزارت خارجہ کے ترجمان اسماعیل بقائی نے کہا کہ ایران کی استقامت اور حوصلہ ان لوگوں کی یادوں اور قربانیوں پر قائم ہے جو ملک کے لیے جان قربان کر چکے ہیں۔ انہوں نے سوشل میڈیا پلیٹ فارم ایکس پر ایک لیگو طرز کی ویڈیو بھی شیئر کی، جس میں کہا گیا کہ زخموں کے باوجود ایران آج بھی مضبوطی سے کھڑا ہے اور اس کے بچے عزم و حوصلے کے ساتھ عالمی سطح پر مقابلے کے لیے تیار ہیں۔ پیغام میں کہا گیا کہ پوری قوم کی دعائیں قومی ٹیم کے ساتھ ہیں اور نوجوان کھلاڑیوں کے لیے کامیابی اور عزت کی خواہش کی جا رہی ہے۔

ورلڈ کپ میں ایرانی شائقین کا احتجاج

دوسری جانب جاری فیفا ورلڈ کپ کے دوران ایرانی شائقین نے لاس اینجلس کے سوفی اسٹیڈیم میں فیفا کی پابندی کے باوجود ایران کا قبل از انقلاب قومی پرچم لہرایا۔  ایران اور نیوزی لینڈ کے درمیان ورلڈ کپ کے افتتاحی میچ سے قبل سیکڑوں مظاہرین اسٹیڈیم کے باہر جمع ہوئے اور ایرانی حکومت کے خلاف احتجاج کیا۔ میچ میں ایران نے دو مرتبہ واپسی کرتے ہوئے نیوزی لینڈ کے خلاف 2-2 سے ڈرا کھیلا۔

یناب حملے پر امریکی دعوے مسترد

ایران کی وزارت خارجہ نے گزشتہ ہفتے امریکی سینٹرل کمانڈ کے اس دعوے کو مسترد کر دیا تھا کہ فروری میں جس اسکول کو نشانہ بنایا گیا وہ دراصل میزائل لانچنگ تنصیب کا حصہ تھا۔ اسماعیل بقائی نے امریکی موقف کو بے بنیاد اور من گھڑت قرار دیتے ہوئے کہا کہ یہ حقیقت چھپانے کی کوشش ہے کہ 28 فروری کے میزائل حملوں میں 170 سے زائد اسکولی بچے اور اساتذہ ہلاک ہوئے تھے۔

حملے کی حقیقت چھپانے کی کوشش کا الزام

ایرانی وزارت خارجہ کے مطابق امریکی دعوے ایک ’’شرمناک تحریف‘‘ ہیں جن کا مقصد میناب میں ہونے والی ہلاکتوں کی سنگین حقیقت کو چھپانا ہے۔ ترجمان نے کہا کہ اسکول پر حملے میں بڑی تعداد میں معصوم بچوں اور اساتذہ کی جانیں گئیں، جسے ایران کبھی فراموش نہیں کرے گا۔ ایرانی حکام کا کہنا ہے کہ میناب کے متاثرین کی یاد ملک کے قومی شعور کا حصہ بن چکی ہے اور ورلڈ کپ میں قومی ٹیم کی جانب سے پیش کیا گیا یہ خراجِ عقیدت اسی یاد کو زندہ رکھنے کی ایک کوشش ہے۔