بھارت-امریکہ تجارتی معاہدہ ایم ایس ایم ایز اور روزگار کے نئے مواقع پیدا کرے گا: امت شاہ

امت شاہ نے اپنے پیغام میں لکھا: ’’بھارت-امریکہ تجارتی معاہدہ بھارت کے ایم ایس ایم ایز کو نئی طاقت فراہم کرے گا۔ اس سے چھوٹی صنعتوں کی عالمی مسابقت میں اضافہ ہوگا، روزگار کے مواقع بڑھیں گے، نئی سپلائی چینز میں جگہ ملے گی اور سرمایہ کاری و کریڈٹ فلو میں نمایاں بہتری آئے گی۔ اس تاریخی اقدام کے لیے وزیر اعظم نریندر مودی کا شکریہ، جو براہ راست ملک کے چھوٹے کاروباریوں کو فائدہ پہنچائے گا۔‘‘ انہوں نے کہا کہ یہ معاہدہ بھارت کی معیشت کے لیے ایک سنگ میل ثابت ہوگا اور صنعتی شعبے کو عالمی منڈی میں نئی شناخت دلائے گا۔

2047 تک ’’وکست بھارت‘‘ کے خواب کی جانب مضبوط قدم

ایک علیحدہ پوسٹ میں امت شاہ نے وزیر اعظم نریندر مودی کو اس اہم معاہدے پر دل کی گہرائی سے مبارکباد دی اور کہا کہ یہ معاہدہ بھارتی معیشت کو نئی رفتار دے گا اور 2047 تک ’’وکست بھارت‘‘ کے ہدف کے حصول میں اہم کردار ادا کرے گا۔ انہوں نے لکھا: ’’این ڈی اے پارلیمانی پارٹی کی میٹنگ میں تمام اراکینِ پارلیمنٹ نے بھارت-امریکہ کے تاریخی تجارتی معاہدے پر وزیر اعظم نریندر مودی کو مبارکباد دی۔ یہ معاہدہ ہر بھارتی کے لیے نئے مواقع کے دروازے کھولے گا۔ یہ معاہدہ نہ صرف روزگار میں اضافہ کرے گا بلکہ 2047 تک بھارت کو ہر شعبے میں عالمی رہنما بنانے کے ہمارے عزم کو حقیقت میں بدلنے کا سنگ میل ثابت ہوگا۔‘‘

وزیراعظم مودی اور صدر ٹرمپ کی گفتگو

اس سے قبل وزیراعظم نریندر مودی نے پیر کے روز امریکی صدر ڈونالڈ ٹرمپ سے ٹیلیفونک گفتگو کے بعد اس معاہدے پر خوشی کا اظہار کیا تھا۔ ایکس پر جاری بیان میں وزیراعظم نے کہا: ’’آج اپنے عزیز دوست صدر ٹرمپ سے بات کر کے خوشی ہوئی۔ مجھے بے حد مسرت ہے کہ ’میڈ ان انڈیا‘ مصنوعات پر امریکی ٹیرف کم ہو کر 18 فیصد ہو گیا ہے۔ اس شاندار اعلان پر بھارت کے 1.4 ارب عوام کی جانب سے صدر ٹرمپ کا شکریہ ادا کرتا ہوں۔‘‘ انہوں نے مزید کہا کہ جب دنیا کی دو بڑی معیشتیں اور سب سے بڑی جمہوریتیں مل کر کام کرتی ہیں تو اس کا فائدہ دونوں ممالک کے عوام کو ہوتا ہے اور باہمی تعاون کے بے شمار مواقع پیدا ہوتے ہیں۔

عالمی امن اور شراکت داری پر زور

وزیراعظم مودی نے امریکی صدر کی قیادت کو عالمی امن، استحکام اور خوشحالی کے لیے اہم قرار دیتے ہوئے کہا کہ بھارت عالمی امن کے لیے امریکہ کی کوششوں کی مکمل حمایت کرتا ہے۔ انہوں نے کہا: ’’میں صدر ٹرمپ کے ساتھ مل کر بھارت-امریکہ شراکت داری کو نئی بلندیوں تک لے جانے کے لیے پرعزم ہوں۔‘‘ قابل ذکر ہے کہ امریکہ کے ساتھ یہ تجارتی معاہدہ ایسے وقت میں طے پایا ہے جب بھارت نے حال ہی میں یورپی یونین کے ساتھ بھی ایک تاریخی تجارتی معاہدہ کیا ہے۔ ماہرین کے مطابق، یہ دونوں معاہدے بھارت کی عالمی تجارتی پوزیشن کو مضبوط بنانے، برآمدات بڑھانے اور ملکی صنعت کو عالمی منڈی سے جوڑنے میں کلیدی کردار ادا کریں گے۔