امریکی صدر ڈونالڈ ٹرمپ کے ذریعہ فارما سمیت کچھ دیگر سیکٹرس پر ٹیرف سے متعلق نئے اعلان نے ہندوستانی شیئر بازار میں کہرام برپا کر دیا ہے۔ خاص طور سے فارما پر ’100 فیصد ٹیرف‘ لگانے کے اعلان کا اثر ہندوستانی فارما کمپنیوں کے شیئرس پر خاطر خواہ پڑتا ہوا دکھائی دے رہا ہے۔ آج صبح سے ہی ہندوستانی شیئر بازار دباؤ میں کاروبار کر رہا ہے۔ فی الحال سنسیکس 412.67 پوائنٹس گر کر 80747.01 پر ہے اور نفٹی 115 پوائنٹس گر کر 24776ر نظر آ رہا ہے۔ فارما شیئرس، جن کا امریکہ میں بڑا ایکسپوزر ہے، پوری طرح بکھرتے ہوئے دکھائی دے رہے ہیں۔
فارما پروڈکٹس سے متعلق ٹرمپ کے اعلان سے ہندوستان کے 5 فارما شیئرس تیزی کے ساتھ بکھرے ہیں۔ ان میں اروندو، لیوپن، ڈی آر ایل، سَن اور بایوکان شامل ہیں۔ اروندو فارما آج 1.91 فیصد گر کر 1076 روپے پر کاروبار کر رہا ہے، جبکہ لیوپن شیئرس میں تقریباً 3 فیصد کی گراوٹ دیکھنے کو ملی ہے اور یہ 1918.60 روپے پر کاروبار کر رہا ہے۔ سن فارما کے شیئرس تقریباً 3.8 فیصد ٹوٹ کر 1580 روپے پر اور سپلا کے شیئرس 2 فیصد گراوٹ کے ساتھ کاروبار کر رہے ہیں۔ اسی طرح اسٹرائیڈس فارما سائنس 6 فیصد، نیٹکو فارما 5 فیصد، بایوکان 4 فیصد، گلین فارما 3.7 فیصد، ڈیویلیب 3 فیصد، آئی پی سی اے لیب 2.5 فیصد اور زائیڈس لائف 2 فیصد ٹوٹے ہیں۔ مینکائنڈ فارما میں بھی 3.30 فیصد کی گراوٹ دیکھنے کو ملی ہے۔
بی ایس ای ٹاپ 30 شیئرس کی بات کریں تو سب سے زیادہ گراوٹ سَن فارما کے شیئرس میں 3.8 فیصد کی رہی۔ اس کے بعد انفوسس، ٹیک مہندرا اور ایشین پینٹس جیسے 25 شیئرس 2 فیصد تک ٹوٹے ہیں۔ بقیہ 5 شیئرس میں تیزی دیکھنے کو ملی ہے۔
