جھارکھنڈ مکتی مورچہ کے بانی شیبو سورین کا پیر کی صبح انتقال ہو گیا۔ 81 سالہ شیبو سورین کے انتقال کے ساتھ ہی ایک سیاسی دور کا خاتمہ ہو گیا۔ اس خبر کے فوراً بعد جھارکھنڈ اسمبلی اجلاس کو غیر معینہ مدت کے لیے ملتوی کر دیا گیا۔ ساتھ ہی ریاستی حکومت نے سابق وزیر اعلیٰ کے انتقال پر 3 روزہ سرکاری غم کا اعلان کر دیا ہے۔
موصولہ اطلاع کے مطابق شیبو سورین کا جسد خاکی آج شام 6 بجے جھارکھنڈ لے جایا جائے گا۔ جسد خاکی کو سب سے پہلے رانچی کے مورہابادی واقع رہائش پر رکھا جائے گا۔ منگل کی صبح اسے جے ایم ایم کے پارٹی دفتر میں آخری دیدار کے لیے رکھا جائے گا۔ اس کے بعد جسد خاکی کو جھارکھنڈ اسمبلی لے اجیا جائے گا، جہاں عوامی نمائندے اور افسران انھیں خراج عقیدت پیش کریں گے۔ آخری رسومات دوپہر 3 بجے ان کے آبائی گاؤں رام گڑھ ضلع کے نیمرا میں کیا جائے گا۔
