نیشنل ہینڈلوم ڈے پر ودیا بالن نے ہندوستانی دستکاری کو کیا سلام، بولیں- ہر ساڑی کہتی ہے اپنی نوکھی کہانی

نئی دہلی : نیشنل ہینڈلوم ڈے کے موقع پر بالی ووڈ اداکارہ ودیا بالن نے ہندوستان کی قدیم اور مالا مال ہینڈلوم روایت، روایتی ملبوسات اور انہیں تیار کرنے والے کاریگروں کو خراج تحسین پیش کیا۔ ہندوستانی ہینڈلوم اور روایتی ساڑیوں کی مضبوط حامی سمجھی جانے والی ودیا بالن نے اس موقع پر انسٹاگرام پر ایک خصوصی ویڈیو شیئر کی، جس میں انہوں نے ہینڈلوم سلک ساڑیوں کی خوبصورتی، ثقافتی ورثے اور بُنکروں کی محنت کو سراہا۔اپنی خوبصورت ساڑیوں کے انتخاب اور عوامی تقریبات میں ہندوستانی ہینڈلوم کو فروغ دینے کے لیے معروف ودیا بالن نے لوگوں سے اپیل کی کہ وہ ہندوستانی ہینڈلوم مصنوعات کو اپنائیں اور مقامی کاریگروں کی حوصلہ افزائی کریں۔اپنی پوسٹ کے کیپشن میں اداکارہ نے لکھا کہ ہر ہینڈلوم سلک ساڑی ایسی کہانی بیان کرتی ہے جسے کوئی مشین کبھی دوبارہ تخلیق نہیں کر سکتی۔ انہوں نے لوگوں سے اپیل کی کہ نیشنل ہینڈلوم ڈے کے موقع پر ان شاندار کاریگروں کو خراجِ تحسین پیش کیا جائے، جن کے ہاتھوں نے ہندوستان کی صدیوں پرانی بُنائی کی روایات کو زندہ رکھا ہے۔

’ہر دھاگا کاریگروں کی محنت بیان کرتا ہے‘

ویڈیو میں ودیا بالن نے ہینڈلوم سلک ساڑیوں کی خصوصیات کا ذکر کرتے ہوئے کہا کہ انہیں ان ساڑیوں کی سب سے خوبصورت بات یہ لگتی ہے کہ ان کا ہر دھاگا، ہر نقش و نگار اور ہر چھوٹی سی تفصیل کاریگروں کی محنت اور نسل در نسل منتقل ہونے والی روایات کی عکاسی کرتی ہے۔ یہی وجہ ہے کہ ہر ہینڈلوم سلک ساڑی اپنے آپ میں منفرد ہوتی ہے۔ودیا بالن نے خالص ریشم خریدنے والے صارفین سے ’سلک مارک‘ ضرور دیکھنے کی اپیل بھی کی۔ ان کے مطابق یہ اصل اور خالص ریشم کی شناخت میں مدد دیتا ہے۔ اس پیغام کے ذریعے انہوں نے لوگوں کو نہ صرف معیاری ہینڈلوم مصنوعات خریدنے بلکہ ہندوستانی روایتی دستکاری اور مقامی کاریگروں کی حوصلہ افزائی کرنے کی طرف بھی متوجہ کیا۔

7 اگست کو منایا جاتا ہے نیشنل ہینڈلوم ڈے

قابل ذکر ہے کہ نیشنل ہینڈلوم ڈے ہر سال 7 اگست کو منایا جاتا ہے۔ یہ دن ہندوستان کی مالا مال ہینڈلوم روایت، بُنکروں کی مہارت اور ان کے اہم کردار کو خراجِ تحسین پیش کرنے کے لیے وقف ہے۔ ہندوستان میں ہینڈلوم صرف کپڑا تیار کرنے کی ایک تکنیک نہیں بلکہ یہ ملک کی ثقافت، تاریخ اور روایات سے جڑا ایک زندہ ورثہ ہے۔ملک کے مختلف علاقوں میں ہزاروں برس سے بُنکر اپنی مہارت، محنت اور تخلیقی صلاحیتوں کے ذریعے منفرد کپڑے اور ملبوسات تیار کرتے آئے ہیں۔ مختلف ریاستوں کی ساڑیاں، شالیں، کپڑے اور دیگر روایتی مصنوعات ہندوستان کی ثقافتی تنوع کی عکاسی کرتی ہیں۔

2015 میں ہوئی نیشنل ہینڈلوم ڈے کی شروعات

نیشنل ہینڈلوم ڈے کا آغاز ہندوستانی حکومت نے 2015 میں کیا تھا۔ 7 اگست کی تاریخ اس لیے منتخب کی گئی کیونکہ 1905 میں اسی دن سوَدیشی تحریک کا آغاز ہوا تھا۔ اس تحریک نے ہندوستانی مصنوعات اور مقامی صنعتوں کو فروغ دینے کا پیغام دیا تھا۔نیشنل ہینڈلوم ڈے منانے کا مقصد ہینڈلوم شعبے کو فروغ دینا، بُنکر برادری کی معاشی صورتحال کو مضبوط بنانا اور لوگوں میں ہندوستانی دستکاری سے تیار ہونے والے روایتی ملبوسات کی اہمیت کے بارے میں بیداری پیدا کرنا ہے۔ ودیا بالن کی اپیل نے بھی اسی روایت کو فروغ دینے اور مقامی کاریگروں کے کام کو سراہنے کا پیغام دیا ہے۔