’لاک اپ ٹو‘ میں اہلیہ سنیتا آہوجا سے ملنے پہنچے گووندا، کہا- اگر یہ میرے سینے پر مارنا چاہتی تھی تو مار لینے دو…

نیٹ فلکس کا ریئلٹی شو ’لاک اپ 2‘ ان دنوں او ٹی ٹی پلیٹ فارم پر خوب مقبولیت حاصل کر رہا ہے۔ شو میں روزانہ نئے ڈرامے اور چونکا دینے والے موڑ ناظرین کی دلچسپی برقرار رکھے ہوئے ہیں۔ حالیہ ایپی سوڈ میں جہاں آکانکشا چمولہ کے شوہر گورو کھنہ بطور مہمان نظر آئے، وہیں اب میکرز نے آنے والے ججمنٹ ڈے ایپی سوڈ کا نیا پرومو جاری کیا ہے، جس نے سوشل میڈیا پر ہلچل مچا دی ہے۔ اس بار بالی ووڈ کے معروف اداکار گووندا اپنی اہلیہ سنیتا آہوجا کی حوصلہ افزائی کے لیے شو میں شرکت کرتے دکھائی دیں گے۔

گوندا نے جیت لیا سب کا دل

جاری کردہ پرومو میں شو کے میزبان فرح خان اور رتیش دیشمکھ، گووندا کا گرمجوشی سے استقبال کرتے نظر آتے ہیں۔ اس دوران گووندا نے اپنی اہلیہ سنیتا آہوجا سے متعلق کئی دلچسپ باتیں بھی شیئر کیں۔ حال ہی میں سنیتا آہوجا نے شو کے دوران ایک ایسا بیان دیا تھا جس پر فرح خان نے مزاحیہ انداز میں گووندا سے سوال کیا، ’’سنیتا نے ایسی سپاری کیوں دی کہ کوئی اسے مار دے؟‘‘ اس پر گووندا نے ہنستے ہوئے جواب دیا، ’’میں تو جیب میں لے کر آیا ہوں۔‘‘ جب فرح نے مسکراتے ہوئے پوچھا، ’’گولی بھی لائے ہو؟‘‘ تو گووندا نے فوراً کہا، ’’اگر یہ میرے سینے پر مارنا چاہتی تھی تو مار لینے دو پورا!‘‘

گووندا اور فرح خان کی دلچسپ گفتگو

گووندا اور فرح خان کی اس دلچسپ گفتگو پر شو میں موجود سبھی لوگ ہنس پڑے، جبکہ جیل کے اندر بیٹھی سنیتا آہوجا بھی اپنی ہنسی نہ روک سکیں۔ تاہم پرومو میں گووندا صرف اسٹیج پر ہی نظر آئے ہیں۔ وہ جیل کے اندر جا کر سنیتا سے ملاقات کریں گے یا نہیں، اس کا انکشاف آنے والے ایپی سوڈ میں ہوگا۔ دوسری جانب سنیتا آہوجا گزشتہ چند دنوں سے شو میں کافی جذباتی دکھائی دے رہی ہیں۔ وہ کئی مرتبہ کیمرے کے سامنے روتے ہوئے کہہ چکی ہیں کہ وہ گھر واپس جانا چاہتی ہیں اور انہیں شو سے باہر نکال دیا جائے۔ سنیتا نے ایک ایپی سوڈ میں یہ بھی بتایا کہ گووندا نے انہیں اس شو میں آنے سے منع کیا تھا اور جب بھی وہ ان کی بات نہیں مانتیں، بعد میں پچھتانا پڑتا ہے۔ ان کی کمزور ہوتی کارکردگی اور مسلسل جذباتی رویے کو دیکھتے ہوئے گھر کے دیگر مقابلہ کرنے والوں نے انہیں اس ہفتے براہِ راست ایلیمینیشن کے لیے نامزد کر دیا ہے۔