کسانوں کے لیے بڑی خوشخبری، امت شاہ آج نفیڈ کا جدید نیلامی پورٹل کریں گے لانچ

نئی دہلی: ملک کے کسانوں اور کوآپریٹو شعبے کے لیے آج کا دن اہم قرار دیا جا رہا ہے۔ مرکزی وزیر داخلہ امت شاہ آج نئی دہلی میں نیشنل ایگریکلچرل کوآپریٹو مارکیٹنگ فیڈریشن آف انڈیا (نفیڈ) کے جدید ڈیجیٹل نیلامی پورٹل کا افتتاح کریں گے۔ حکومت کا کہنا ہے کہ اس اقدام سے زرعی تجارت میں شفافیت بڑھے گی، بیچولیوں کا کردار کم ہوگا اور کسانوں کو اپنی محنت کی بہتر قیمت حاصل کرنے میں مدد ملے گی۔نئے ڈیجیٹل پلیٹ فارم کا مقصد نیلامی کے پورے نظام کو آن لائن اور شفاف بنانا ہے۔ اب تک نیلامی کے عمل میں تاخیر، معلومات کی کمی اور شفافیت سے متعلق مختلف شکایات سامنے آتی رہی ہیں، لیکن نافیڈ کے اس پورٹل کے آغاز کے بعد تمام سرگرمیاں ڈیجیٹل پلیٹ فارم پر انجام دی جا سکیں گی۔ اس سے کسانوں، رکن اداروں اور دیگر متعلقہ فریقوں کو براہ راست فائدہ پہنچنے کی توقع ہے۔

حکام کے مطابق پورے نظام کے آن لائن ہونے سے کام کی رفتار میں اضافہ ہوگا اور بدعنوانی یا بے ضابطگیوں کے امکانات کم ہوں گے۔ کسان اپنی پیداوار کی فروخت کے عمل کو زیادہ آسانی اور اعتماد کے ساتھ انجام دے سکیں گے، جبکہ مارکیٹ میں شفافیت بھی بڑھے گی۔اس موقع پر امت شاہ صرف نیلامی پورٹل ہی نہیں بلکہ کسانوں اور زرعی شعبے کی بہتری کے لیے کئی دیگر اہم منصوبوں کا بھی آغاز کریں گے۔ ان میں NAFED-KALYAN اسکالرشپ شامل ہے، جس کا مقصد کسانوں کے بچوں کو تعلیمی مواقع فراہم کرنا اور ان کے روشن مستقبل کی راہ ہموار کرنا ہے۔

اسی طرح درشٹی (DRISHTI) پورٹل بھی لانچ کیا جائے گا، جس کے ذریعے دالوں اور تیل دار اجناس کے ذخائر اور انوینٹری کی نگرانی مؤثر انداز میں کی جا سکے گی۔ اس نظام سے حکومت اور متعلقہ اداروں کو پیداوار اور ذخائر کے درست اعداد و شمار حاصل ہوں گے، جس سے پالیسی سازی میں مدد ملے گی۔علاوہ ازیں ERP پورٹل کا بھی افتتاح کیا جائے گا، جس کا مقصد نافیڈ کے اندرونی انتظامی نظام کو مزید مضبوط اور تیز رفتار بنانا ہے۔ اس سے ادارے کے مختلف شعبوں کے درمیان رابطے اورکام کی کارکردگی میں بہتری آنے کی امید ہے۔

ان ڈیجیٹل اقدامات کے آغاز کے بعد امت شاہ نفیڈ کے بورڈ آف ڈائریکٹرز کے ساتھ ایک اعلیٰ سطحی اجلاس کی صدارت بھی کریں گے۔ اجلاس میں ادارے کی موجودہ پیش رفت، مستقبل کے منصوبوں اور کسانوں کی فلاح و بہبود سے متعلق حکمت عملی پر غور کیا جائے گا۔ حکومت کا ماننا ہے کہ جدید ٹیکنالوجی، شفافیت اور بہتر انتظامی نظام کے ذریعے ’’سہکار سے سمردھی‘‘ کے وژن کو مزید مضبوط بنایا جا سکتا ہے۔ ماہرین کے مطابق نافیڈ کا نیا نیلامی پورٹل زرعی مارکیٹنگ کے شعبے میں ایک اہم پیش رفت ثابت ہو سکتا ہے، جس سے کسانوں کو براہ راست فائدہ پہنچنے کی توقع ہے۔