امریکہ-ایران امن معاہدے کا وزیراعظم مودی نے کیا خیرمقدم، کہا-’’معاہدے پرعمل درآمد سے عالمی تجارت اور سمندری راستوں پر نقل و حرکت ہوگی بحال

نئی دہلی: وزیر اعظم نریندر مودی نے امریکہ اور ایران کے درمیان مغربی ایشیا میں جاری تنازع کے خاتمے کے لیے طے پانے والی مفاہمت کا خیرمقدم کرتے ہوئے امید ظاہر کی ہے کہ اس سے خطے میں امن اور استحکام کو فروغ ملے گا۔ سوشل میڈیا پلیٹ فارم ایکس پر اپنے پیغام میں وزیراعظم نے کہا کہ اس تنازع کی وجہ سے عالمی معیشت کو شدید دھچکا پہنچا اور کئی ممالک میں انسانی جانوں کا نقصان بھی ہوا۔ انہوں نے کہا کہ امریکہ اور ایران کے درمیان طے پانے والی نئی سمجھ بوجھ ایک مثبت پیش رفت ہے، جس سے خطے میں معمول کے حالات بحال ہونے کی توقع ہے۔

عالمی تجارت اور سمندری راستوں کے لیے اہم پیش رفت

نریندر مودی نے کہا کہ اگر اس معاہدے پر مؤثر انداز میں عمل کیا گیا تو اس سے نہ صرف خطے میں امن قائم ہوگا بلکہ سمندری راستوں پر بلا رکاوٹ آمدورفت اور عالمی تجارت کو بھی تحفظ حاصل ہوگا۔ انہوں نے امید ظاہر کی کہ دونوں ممالک کے درمیان باقی ماندہ معاملات پر جاری مذاکرات بھی مثبت سمت میں آگے بڑھیں گے اور بالآخر ایک جامع اور دیرپا معاہدے تک رسائی حاصل ہو سکے گی۔

ٹرمپ نے معاہدہ طے پانے کا کیا اعلان

اتوار کو امریکی صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر اعلان کیا کہ ایران کے ساتھ معاہدہ مکمل ہو چکا ہے۔ انہوں نے اپنی پوسٹ میں لکھا کہ ’’اسلامی جمہوریہ ایران کے ساتھ معاہدہ اب مکمل ہو گیا ہے، سب کو مبارک ہو۔‘‘ امریکی صدر نے آبنائے ہرمز کو دوبارہ کھولنے کا بھی ذکر کیا اور کہا کہ اس اقدام سے عالمی سطح پر تیل کی ترسیل دوبارہ معمول پر آ سکے گی۔

خطے میں امن اور سلامتی کو ملے گا فروغ

صدر ٹرمپ نے ایک اور بیان میں اس مفاہمت کو تاریخی کامیابی قرار دیتے ہوئے کہا کہ اس سے پورے خطے میں امن اور سلامتی کو فروغ ملے گا۔ ان کے مطابق کئی امریکی صدور نے ایران کے ساتھ امن قائم کرنے کی کوشش کی، لیکن کامیابی حاصل نہیں کر سکے۔ انہوں نے دعویٰ کیا کہ موجودہ معاہدہ مشرقِ وسطیٰ میں استحکام اور اقتصادی سرگرمیوں کی بحالی کا سبب بنے گا۔

عالمی رہنماؤں نے بھی کیا خیرمقدم

معاہدے کے اعلان کے بعد مختلف ممالک کے رہنماؤں نے اس پیش رفت کا خیرمقدم کیا ہے۔ انتھونی البانیز اور پینی وونگ نے مشترکہ بیان میں کہا کہ آسٹریلیا اس بات سے خوش ہے کہ معاہدے میں آبنائے ہرمز کو دوبارہ کھولنے اور جہاز رانی کی آزادی بحال کرنے کے اقدامات شامل ہیں۔ ماہرین کے مطابق اس معاہدے سے عالمی توانائی منڈیوں میں استحکام پیدا ہونے اور مغربی ایشیا میں کشیدگی کم ہونے کی امید کی جا رہی ہے۔