تھوڑی شرم کرو اور ہمت دکھاؤ، مہوا موئترا یوسف پٹھان پر کیوں برس پڑیں؟

نئی دہلی: ترنمول کانگریس (ٹی ایم سی) کی رکن پارلیمنٹ مہوا موئترا نے پارٹی کے اندرونی اختلافات کے درمیان بہرام پور سے رکن پارلیمنٹ اور سابق کرکٹر یوسف پٹھان پر سخت تنقید کی ہے۔ موئترا نے یوسف پٹھان پر پارٹی کے باغی دھڑے کا ساتھ دینے کا الزام عائد کرتے ہوئے انہیں عوام کے اعتماد کا احترام کرنے کا مشورہ دیا۔یہ تنازع ایسے وقت سامنے آیا ہے ،جب ترنمول کانگریس مبینہ طور پر اپنے قیام کے بعد کے سب سے بڑے سیاسی بحران کا سامنا کر رہی ہے۔ اطلاعات کے مطابق پارٹی کے 28 لوک سبھا اراکین میں سے 20 نے الگ ہو کر ایک نیا گروپ تشکیل دے دیا ہے، جس کے بعد پارٹی کے اندر سیاسی ہلچل تیز ہو گئی ہے۔کرشن نگر سے لوک سبھا رکن مہوا موئترا نے سوشل میڈیا پلیٹ فارم ایکس پر ایک پوسٹ میں یوسف پٹھان کو نشانہ بناتے ہوئے کہا کہ ’’ہمارے ضلع کے لوگوں نے آپ کو بھاری اکثریت سے کامیاب بنایا ہے، تھوڑی شرم کریں اور کچھ ہمت بھی دکھائیں۔‘‘ انہوں نے الزام لگایا کہ یوسف پٹھان نئی دہلی جانے اور مبینہ طور پر مرکزی وزیر داخلہ امت شاہ کی دعوت قبول کرنے میں غیر معمولی دلچسپی دکھا رہے ہیں۔مہوا موئترا اب بھی مغربی بنگال کی  سابق وزیر اعلیٰ ممتا بنرجی کے ساتھ مضبوطی سے کھڑی نظر آ رہی ہیں۔ انہوں نے حالیہ دنوں میں پارٹی کے باغی لیڈروں اور اراکین اسمبلی کو بھی شدید تنقید کا نشانہ بنایا تھا اور انہیں ایسے سیاست دان قرار دیا تھا جو صرف ممتا بنرجی کی مقبولیت کے سہارے سیاست میں قائم ہیں۔

یوسف پٹھان سے متعلق تنازع کیسے شروع ہوا؟

تنازع اس وقت شدت اختیار کر گیا جب ایک بنگالی اخبار میں شائع ہونے والی رپورٹ میں دعویٰ کیا گیا کہ ترنمول کانگریس نے سابق بھارتی کرکٹ کپتان سورو گنگولی کے ذریعے یوسف پٹھان سے اپنی لوک سبھا نشست چھوڑنے کی درخواست کی تھی۔ مبینہ طور پر پارٹی چاہتی تھی کہ بہرام پور سیٹ خالی ہو جائے تاکہ ممتا بنرجی وہاں سے ضمنی انتخاب لڑ سکیں۔ تاہم رپورٹ میں یہ بھی دعویٰ کیا گیا کہ یوسف پٹھان نے اس تجویز کو قبول کرنے سے انکار کر دیا۔

بہرام پور میں پہلی بار ٹی ایم سی کی کامیابی

بہرام پور لوک سبھا حلقہ طویل عرصے تک کانگریس کا مضبوط گڑھ سمجھا جاتا تھا، لیکن 2024 کے عام انتخابات میں یوسف پٹھان نے کانگریس کے سینئرلیڈر ادھیر رنجن چودھری کو شکست دے کر تاریخ رقم کی۔ وہ ترنمول کانگریس کے قیام کے بعد بہرام پور سے کامیابی حاصل کرنے والے پہلے ٹی ایم سی امیدوار بنے۔سیاسی مبصرین کے مطابق بہرام پور میں مسلم ووٹروں کی بڑی تعداد کے باعث ٹی ایم سی اس حلقے کو ممتا بنرجی کے لیے ایک محفوظ انتخابی میدان تصور کر رہی تھی۔ یوسف پٹھان کے مبینہ انکار اور پارٹی کے اندر جاری اختلافات نے اس معاملے کو مزید پیچیدہ بنا دیا ہے۔ اب سب کی نظریں اس بات پر ہیں کہ ترنمول کانگریس اس اندرونی بحران سے کیسے نمٹتی ہے اور یوسف پٹھان اس تنازع پر کیا مؤقف اختیار کرتے ہیں۔