ندرا (گجرات): متحدہ عرب امارات سے روانہ ہونے والا بھارتی پرچم بردار خام تیل کا ٹینکر جگ لاڈکی بدھ کے روز بھارت پہنچ گیا اور مندرا پورٹ پر کامیابی کے ساتھ لنگر انداز ہو گیا۔ یہ بندرگاہ اڈانی گروپ کے زیر انتظام ہے۔ اس ٹینکر میں تقریباً 80,886 میٹرک ٹن خام تیل موجود ہے، جو فجیرہ بندرگاہ سے لوڈ کیا گیا تھا۔ 274 میٹر طویل اور 50 میٹر چوڑے اس جہاز کی ڈیڈ ویٹ صلاحیت تقریباً 1.64 لاکھ ٹن ہے، جو اسے بڑے آئل ٹینکروں میں شمار کرتی ہے۔ فجیرہ بندرگاہ مشرق وسطیٰ کی چند اہم بندرگاہوں میں شامل ہے جو آبنائے ہرمز کے باہر واقع ہیں۔ یہ وہ اسٹریٹجک راستہ ہے جہاں سے دنیا کے تقریباً 20 فیصد خام تیل کی ترسیل ہوتی ہے، لیکن ایران-امریکہ-اسرائیل کشیدگی کے باعث اس علاقے میں غیر یقینی صورتحال پیدا ہو گئی ہے۔
بھارت کی توانائی سلامتی میں اہم کردار
مندرا پورٹ پر اس ٹینکر کی آمد اس بات کو ظاہر کرتی ہے کہ بھارت بڑے پیمانے پر خام تیل کی درآمد کو سنبھالنے کے لیے کس قدر تیار ہے۔ یہ سپلائی ملک کی ایک بڑی ریفائنری کے لیے نہایت اہم ہے، جو موجودہ علاقائی کشیدگی کے دوران آپریشن برقرار رکھنے اور توانائی سلامتی کو مضبوط بنانے میں مدد دے گی۔ اس سے قبل شیوالک اور نندا دیوی نامی دو ایل پی جی بردار جہاز بھی بھارت پہنچ چکے ہیں۔ جبکہ نندا دیوی نے وڈینارپورٹ (کچھ کے نزدیک کینڈلا پورٹ کے قریب) پر لنگر انداز ہو کر تقریباً 92,700 ٹن ایل پی جی کی سپلائی دی۔ مغربی ایشیا میں جاری کشیدگی کے باوجود بھارت مسلسل اپنی توانائی سپلائی کو مستحکم رکھنے کے لیے اقدامات کر رہا ہے، اور اس طرح کی ترسیلات ملک کی اقتصادی و صنعتی سرگرمیوں کے تسلسل کے لیے انتہائی اہم سمجھی جا رہی ہیں۔
